ഒറ്റമൈനയുടെ ഒപ്പം കൂടിയവര്‍

Friday, 13 April 2012

അഞ്ചാം മന്ത്രിയെന്ന ലിറ്റ്മസ് ടെസ്റ്റ്‌

  
              കേരളത്തിന്റെ രാഷ്ട്രീയ ചരിത്രവഴിയില്‍ ഒരു  ബദല്  രാഷ്ട്രീയത്തിന്റെ കൊടിയടയാളമായി 
രേഖപ്പെട്ടു കിടക്കുന്ന ഒരു നാഴികക്കല്ലാണ് യു ഡി എഫ് രൂപീകരണം. കെ കരുണാകരനും അബ്ദുറഹ്മാന്‍ ബാഫഖി തങ്ങളും ഇന്ദിരാഗാന്ധിയുടെ ആശീര്‍വാദത്തോടെ ഈ മുന്നണിക്ക് രൂപം കൊടുക്കുമ്പോള്‍ 
എകെ ആന്റണി കോണ്ഗ്രസ്സിന്റെ എതിര്‍പാളയത്തില്‍ ആയിരുന്നുവെന്നതും ചരിത്രം. മുന്നണിക്കകത്തായിട്ടും
ശില്പികളിലൊരാളായിട്ടുംഅയിത്തത്തിന്റെ നാള്‍വഴികളേറെ പിന്നിട്ടാണ് ലീഗ് ഭരണസാരഥ്യം  വഹിക്കാന്‍ തുടങ്ങിയത് തന്നെ.  പണ്ട് സീ എച്ച്  മുഹമ്മദ്‌ കോയയെ സ്പീകര്‍ ആകാന്‍ തിട്ടൂരങ്ങള്‍
 കൊണ്ട് പൊതിഞ്ഞ കോണ്ഗ്രസ് കാലവും അറബി ഭാഷാദ്ധ്യാപകന്‍ അംഗീകരിക്കപ്പെടണമെങ്കില്‍
കേട്ട് കേള്‍വി പോലുമില്ലാത്ത നിബന്ധനകള്‍ കൊണ്ട് വന്നു തടസ്സങ്ങളുടെ വേലിക്കെട്ടുകള് ‍സൃഷ്‌ടിച്ച
നായനാര്‍ കാലഘട്ടവും പിന്നിട്ട് 1982 - ല്‍ പതിനാലും 87 - ല് പതിനഞ്ചും 91 - ല്  പത്തൊമ്പതും
ബാബറി ധ്വംസനത്തിന്റെ പശ്ചാത്തലമുള്ള 96 - ല്‍ പതിമൂന്നും കനത്ത തിരിച്ചടി നേരിട്ട 2006 - ല്‍ ‍ഏഴും തിരിച്ചു വരവിന്റെ സുനാമി തീര്‍ത്തു 2011-ല്‍ ഇരുപതു സീറ്റിന്റെ എക്കാലത്തെയും മികച്ച 
നേട്ടവുമായി ലീഗ് അതിന്റെ അടിവേര് കേരളരാഷ്ട്രീയ ഭൂമികയില്‍ ക്രമേണ ബലപ്പെടുത്തിക്കൊണ്ടേയിരിക്കുന്നു.
 ഇതിനിടയില്‍ ലീഗിന് വാര്‍ഡ്‌ മെമ്പര്മാരുണ്ടായി, പഞ്ചായത്ത് പ്രസിഡന്റുമാരുണ്ടായി, ബ്ലോക്കിലും 
ജില്ലയിലും പ്രസിഡന്റുമാരും കൌണ്‍സിലര്മാരുമുണ്ടായി, എം എല്‍ എ മാരുണ്ടായി,
എം പി മാരുണ്ടായി, വിദ്യാഭ്യാസവും പൊതു മരാമത്തും തദ്ദേശ വകുപ്പും വ്യവസായവും ഐ ടി യും 
ആഭ്യന്തരവുമൊക്കെ ഭരിച്ചു, ചീഫ് വിപ്പ് ആയി, സ്പീക്കറായി, ഉപമുഖ്യമന്ത്രിയായി, മുഖ്യമന്ത്രിയായി, കേന്ദ്രത്തില്‍ മന്ത്രിയായി, രാഷ്ട്രീയ വളര്‍ച്ചയുടെ ഗ്രാഫില്‍ 
പുരോഗമനാത്മകമായ വരകള്‍ തീര്‍ത്ത് ലീഗതിന്റെ പ്രയാണം തുടരുന്നതിന്നിടയിലാണ് 'അഞ്ചാം മന്ത്രി' 
എന്ന കേവല രാഷ്ട്രീയാവശ്യം ദുരുദ്ധേശപരമായി ലൈവ് ആക്കി നിര്‍ത്തപ്പെട്ടതിന് കേരളം സാക്ഷിയാകുന്നത്. 
ഈ വിഷയത്തെ പരിശോധനക്ക് വിധേയമാക്കുമ്പോള്‍ ചില കാര്യങ്ങള്‍ പറയാതെ പോകുന്നത് അഭംഗിയാവും.
    ‍  
    
        ഒന്നാമതായി, മുസ്ലിം ലീഗ്  സാമൂഹിക സത്യാവസ്ഥകളെ ഉള്‍ക്കൊണ്ടും ദൂരക്കാഴ്ച നടത്തിയും     പ്രായോഗിക രാഷ്ട്രീയത്തിന്റെ മൂശയില്‍ വാര്‍ത്തെടുക്കപ്പെട്ട  ഒരു സാമുദായിക സംഘടിത രാഷ്ട്രീയ രൂപമാണ്. അത് പ്രതിലോമകരമായ ഒരു വര്‍ഗീയ മുതലെടുപ്പിലൂടെ അധികാരത്തിന്റെ അപ്പക്കഷണം പങ്കിട്ടെടുക്കാനുള്ള ഒരു ഏണിയായിട്ടല്ല,  മറിച്ച് ചരിത്ര വഴിയില്‍ പല കാരണങ്ങളാല്‍  പൊതുമണ്ഡലത്തില്‍ നിന്നും നിഷ്കാസിതമായിപ്പൊയേക്കാമായിരുന്ന ഒരു ജനസഞ്ചയത്തെ  അഭിമാനകരമായ ഒരു അസ്തിത്വത്തെക്കുറിച്ച്   ബോധ്യം ചെയ്തെടുക്കാന്‍ അധികാരം അതിലേക്കുള്ള  അനിവാര്യമായ ആയുധമാണെന്ന് തിരിച്ചറിഞ്ഞ്,  ഈ സംഘബോധത്തെ ജനാധിപത്യ മതനിരപേക്ഷ ചേരിയില്‍ വരി നിര്‍ത്തിയും,  അപ്പുറം വരിയുടക്കാന്‍ കാത്തിരിക്കുന്ന സവര്‍ണ്ണ ലോബ്യിങ്ങിനെ പ്രതിരോധിച്ചും ഭരണനിര്‍വഹണത്തില്‍ പങ്കാളിയാക്കാനുള്ള പടവുകളായിട്ടാണ് ഇതിന്റെ സൃഷ്ടാക്കള്‍ ഇതിനെ കണ്ടത്. കാലപ്രയാണത്തില്‍ ആ ലകഷ്യത്തില്‍ നിന്നും വ്യതിചലിക്കാനുള്ള ചില ശ്രമങ്ങള്‍ ഉണ്ടായി വരുന്നുവെന്നത് വിസ്മരിക്കുന്നില്ല.  എന്നാലും രാജ്യമൊട്ടാകെ    മുന്നില്‍ മലര്‍ക്കെ തുറന്നു കിടക്കുന്ന ഒട്ടേറെ സാമൂഹിക ഉദാഹരണങ്ങളുണ്ടാവുമ്പോള്‍ ഈ രാഷ്ട്രീയ സൂത്രവാക്യം അതിന്റെ മാര്‍ഗ്ഗവും ലക്ഷ്യവും ഒരു പരിധി വരെ  പിഴക്കാതെ മുന്നേറുന്നു എന്ന് തന്നെ വേണം പറയാന്‍. 

        മറ്റൊന്ന്, ഈയൊരു സംഘടിത സാമുദായിക  രാഷ്ട്രീയ രൂപം ഇവിടെ ഇല്ലായിരുന്നെങ്കില്‍ ഭരണവര്‍ഗ്ഗത്തിന്റെ അരമനകളില്‍ ഇവിടത്തെ ന്യൂനപക്ഷക്കാരന്‍ എത്തുമായിരുന്നോ എന്നുള്ള  ചോദ്യമാണ്. ഈയൊരു അന്വേഷണത്തിനുള്ള ഉത്തരം വളരെ പെരിയ ഗവേഷണത്തിന്റെ ആവശ്യകതയൊന്നും ട്രിഗ്ഗര്‍ ചെയ്യേണ്ടതില്ലാത്ത വിധം ലളിതവും സുവ്യക്തവുമാണ്. ഇവിടത്തെ അവര്‍ണ്ണനും ന്യൂനപക്ഷവും ഈഴവനും കീഴാളരുമൊന്നും അധികാരത്തിന്റെയും ഭരണ നിര്‍വഹണ സങ്കേതങ്ങളുടെയുമൊക്കെ   നാലയലത്ത്‌ പോലും പ്രതിഷ്ഠിക്കപ്പെടാന്‍ ഇവിടത്തെ സവര്‍ണ- ഫാഷിസ്റ്റ്‌ -സ്ടാലിനിസ്റ്റ്  രാഷ്ട്രീയ സമവാക്യങ്ങള്‍ സമ്മതിക്കില്ലായെന്നത്  ആര്‍ക്കാണ് അറിഞ്ഞു കൂടാത്തത്.  അത്തരമൊരു രാഷ്ട്രീയ യാഥാര്‍ത്ഥ്യം കൂടി മനസ്സിലോര്‍ത്തു കൊണ്ട് വേണം ഇപ്പോഴുണ്ടായ ഈ അഞ്ചാം മന്ത്രി വിവാദത്തിന്റെ പിന്നാമ്പുറങ്ങളിലേക്ക് ചൂട്ടുമായി ചെല്ലേണ്ടത്.

        എങ്ങനെയാണ്  അഞ്ചാം മന്ത്രി ഒരു രാഷ്ട്രീയ ആവശ്യമായി ഉയര്‍ന്നു വരുന്നത് എന്ന് പരിശോധിക്കുമ്പോള്‍ ചില കാര്യങ്ങള്‍ വ്യക്തമാകും. 2011 -ലെ കേരള നിയമസഭാ തെരഞ്ഞെടുപ്പ്  കോണ്ഗ്രസ്സിനെ സംബന്ധിച്ചിടത്തോളം ഒറ്റയ്ക്ക് പരിശോധിച്ചാല്‍ ഒരു വാട്ടര്‍ ലൂ ആയിരുന്നു (അവര്‍ അത് സമ്മതിക്കില്ലെങ്കിലും). 2001 -ലെ പോലെ തന്നെ  ഒരു ക്ളീന്‍ സ്വീപ്പ് വിജയം പ്രതീക്ഷിച്ചിരുന്ന ഐക്യ മുന്നണിക്ക്‌  ഇത്തവണ ഭരിക്കാമെന്ന ഉറപ്പു പോലുമാവാന്‍ വോട്ടെണ്ണി തീരുന്നതിന്റെ ഒടുവിലത്തെ നിമിഷം വരെ കാത്തിരിക്കേണ്ട വിധം സങ്കീര്ണ്ണമായിരുന്നു ജനമനസ്സുകളില്‍ കോണ്‍ഗ്രസ്സിനോടുള്ള  സമീപനം. അതെന്തു കൊണ്ടുണ്ടായി എന്ന് ഒരു ആത്മപരിശോധനക്ക്  കൊണ്ഗ്രസ്സിലെ ഒരു വിഭാഗം തയ്യാറാകുന്നില്ല എന്നതും പരിഹാസ്യമാണ്. ഈയൊരു തിരിച്ചടിയിലും യൂ ഡി എഫിന് അധികാരത്തിന്റെ ചെങ്കോല്‍ നേടിക്കൊടുക്കുന്നത് ലീഗ് നേടിയ അഭൂതപൂര്‍വ്വമായ ഭൂരിപക്ഷത്തോടെയുള്ള വിജയങ്ങളാണ് എന്നത് വിശദീകരിക്കേണ്ട കാര്യമില്ല.  രാജ്യമൊട്ടാകെ തിരിച്ചടികള്‍ നേരിട്ടിരിക്കുന്ന കോണ്ഗ്രെസ്സിനു ആശ്വാസമായി കേരള ഭരണം
കയ്യില്‍ വന്നപ്പോള്‍ ആ വിജയത്തിന്റെ മുഖ്യശില്പി എന്ന നിലയില്‍ ലീഗ് ചില പ്രത്യുപകാരങ്ങള്‍ കേന്ദ്രത്തില്‍ പ്രതീക്ഷിച്ചിരുന്നു എന്ന് വ്യക്തം. നിയമസഭാ ഫലപ്രഖ്യാപനത്തിനു പിന്നാലെ  വന്ന കേന്ദ്ര കാബിനെറ്റ്‌  പുന:സംഘടനയില്‍ ഇ.അഹമ്മദ്‌  കാബിനെറ്റ്‌ റാങ്കിലേക്കുയര്‍ത്തപ്പെടുമെന്ന ചില ധാരണകള്‍ ദില്ലിയില്‍ പരന്നിരുന്നെങ്കിലും തന്റെ രാഷ്ട്രീയവഴിയെ കൃത്യമായ ഗണിതവാക്യങ്ങളിലൂടെ പ്രോഗ്രാം ചെയ്തു വെച്ചിട്ടുള്ള എ കെ ആന്റണി എന്ന പൊളിറ്റിക്കല്‍ വിസാര്‍ഡ്  വളരെ തന്ത്രപരമായി ആ നീക്കത്തെ മണ്ണെണ്ണയൊഴിച്ചു കരിക്കുകയായിരുന്നു.


        അറക്കപ്പറമ്പില്‍ കുര്യന്‍ ആന്റണി എന്ന രാഷ്ട്രീയ  പ്രതിഭാസത്തെ രാഷ്ട്രീയത്തില്‍ ഭാവി കാത്തു കുപ്പായം തുന്നുന്ന എല്ലാ കുട്ടിരാഷ്ട്രീയക്കാരും രാഷ്ട്രീയ വിദ്യാര്‍ഥികളും സസൂക്ഷ്മം പഠിക്കേണ്ടതായ ഒരു സ്പെസിമെന്‍ ആണെന്ന് ഞാന്‍ പറയും. ഇന്ദിരാഗാന്ധി അടിയന്തരാവസ്ഥക്കാലത്തെ ദുഷ്ചെയ്തികളിലൂടെ പേരുദോഷമുണ്ടാക്കിയപ്പോള്‍ സമര്‍ത്ഥമായി എതിര്‍ചേരിയിലേക്ക് മാറിയ ആന്റണി ഇന്ദിരാ പ്രഭാവത്തിന് ശേഷം കോണ്ഗ്രസ്സിലേക്ക് തിരിച്ചെത്തി യു ഡി എഫിന്റെ ഭാഗമാവുകയായിരുന്നു.  പിന്നീട്  1979 -ല്‍ ഇന്ത്യന്‍ രാഷ്ട്രീയ ചരിത്രത്തില്‍ തന്നെ പുതിയ അദ്ധ്യായം തുന്നിച്ചേര്‍ത്തു സീ എച്ച്  മുഹമ്മദ്‌ കോയ കേരളത്തിന്റെ മുഖ്യമന്ത്രി ആയപ്പോള്‍ കേവലം അമ്പതു ദിവസം പോലും  ആ ചരിത്രനിയോഗത്തെ നിലനിര്‍ത്താന്‍ സഹിഷ്ണുത കാണിക്കാതെ പാലം വലിച്ചു വീഴ്ത്തിയതും ഇതേ ആന്റണി. പിന്നെയും കാലം ഏറെ മാറി, ആന്റണിയെ ലീഗ്  സ്വന്തം സിറ്റിംഗ് എം എല്‍ യെ രാജി വെപ്പിച്ചു തിരൂരങ്ങാടിയില്‍ കൊണ്ട് വന്നു വിജയിപ്പിച്ചു മുഖ്യമന്ത്രി സ്ഥാനം നിലനിര്ത്തിക്കൊടുത്തു. ന്യൂനപക്ഷങ്ങള്‍ അനര്‍ഹമായത് രാഷ്ട്രീയ സമ്മര്‍ദ്ദങ്ങളിലൂടെ വാങ്ങിക്കൂട്ടുന്നു എന്ന് പരിഭവിച്ചതും ഇതേ ആന്റണി.  മുമ്പ് സീയെച്ചിനെ താഴെയിറക്കിയതിന്റെ ഓര്‍മകളുടെ നീറ്റലോടെയാവണം ലീഗ് തന്നെ മുന്‍കയ്യെടുത്തു ആന്റണിയെ താഴെയിറക്കി. അഴിമതിയുടെ കറപുരളാതെ നില നില്‍ക്കുന്നു എന്ന ഇമേജ് ഈ രാഷ്ട്രീയ കളിക്കാരനെ ഒരു കവചം പോലെ കാത്തു പോകുന്നു. മന്ത്രിയും മുഖ്യമന്ത്രിയും എം പിയും കേന്ദ്രമന്ത്രിയും കേന്ദ്ര കാബിനെറ്റിലെ രണ്ടാമനും ഹൈക്കമാന്‍ഡിന്റെ വിശ്വസ്തനും പ്രമുഖ സംസ്ഥാനങ്ങളുടെ പാര്‍ടി ചുമതലക്കാരനും അച്ചടക്കസമിതി അധ്യക്ഷനും തോല്‍വി പഠനസമിതി അധ്യക്ഷനും ഒക്കെയായി ഇങ്ങനെ പരിലസിക്കുന്ന കക്ഷി ഇനി പ്രധാനമന്ത്രിയും അപ്പുറം ജീവിത സായന്തനത്തില്‍ സുഖവാസമായി രാഷ്ട്രപതിപദവും ഒക്കെ അലങ്കരിക്കാനുള്ള കൃത്യമായ ആക്ഷന്‍ പ്ളാനുമായി സൌമ്യമായി കാത്തിരിക്കുന്നു. 

       കാബിനെറ്റ്‌ പദവി എന്ന സ്വപ്നം പൊലിഞ്ഞതോടെ മുന്നേ തീരുമാനിച്ച  നാല് മന്ത്രിമാരെന്ന ഫോര്‍മുല  പുനര്‍ചിന്തനത്തിന് വിധേയമാക്കാന്‍ ലീഗ് നിര്‍ബന്ധിതമായി. കൂടെ,  പാര്ട്ടിക്കകത്തുള്ള ചിദ്രതയാല്‍ പെരിന്തല്‍മണ്ണയില്‍ ഗതി കിട്ടാതെയായ ലീഗിന്  മഞ്ഞളാംകുഴി അലിയുടെ തേരോട്ടം ഉണ്ടാക്കിയ ആശ്വാസം അദ്ദേഹത്തിന് ജയിച്ചാല്‍ മന്ത്രിപദം എന്നുള്ള വാക്ക് പാലിക്കാന്‍ നിര്‍ബന്ധിതമാക്കി. എം കെ മുനീര്‍ ചാനല്‍ സ്ഥാനം രാജിവെച്ച് മന്ത്രിയാവാന്‍ വന്നതോടെ ഫോര്‍മുലകള്‍ തകിടം മറിഞ്ഞു. അങ്ങിനെയാണ് അപക്വമായ ഒരു പ്രഖ്യാപനം ഹൈദരാലി ശിഹാബ് തങ്ങളെ കോട്ടയത്ത്‌ കൊണ്ട് വന്നു പറയിപ്പിക്കുന്നത്. തികച്ചും രാഷ്ട്രീയ സ്വഭാവമുള്ള ഈയൊരു പ്രശ്നത്തെ ആ അര്‍ത്ഥത്തില്‍ തന്നെ പൊളിച്ചടക്കി പൊതുജനമധ്യത്തില്‍ അനാവരണം ചെയ്യാമായിരുന്നു. പക്ഷെ കേരളത്തിലെ ഇടതും വലതും സംഘപരിവാരങ്ങളും സവര്‍ണ മേസ്തിരിമാരും മീഡിയയുമെല്ലാം ഈയൊരു വിഷയത്തെ വര്‍ഗ്ഗീയമായി കൈകാര്യം ചെയ്തതോടെ വിഷയത്തിന്റെ തലം തന്നെ മാറുകയാണുണ്ടായത്.  ലീഗിനൊരു അഞ്ചാമത് മന്ത്രി കൊടുക്കുന്നതോടെ കേരളത്തിലെ സാമുദായിക സന്തുലനം ആകെ തല കീഴാകുമെന്നും ഭൂരിപക്ഷ വികാരത്തിനെതിരാണെന്നുമുള്ള വിധത്തില്‍ ആസൂത്രിതമായി പ്രചാരണങ്ങള്‍ അഴിച്ചു വിട്ടതോടെ കേവലം  ലീഗിന്റെ ഒരു ആഭ്യന്തര പ്രശ്നം എന്നതില്‍ നിന്നും മാറി രമേശ്‌ ചെന്നിത്തല കെ പി സി സി അധ്യക്ഷനായി വന്നത് മുതല്‍  കോണ്ഗ്രസ്സിനകത്തുണ്ടായിക്കൊണ്ടിരിക്കുന്ന സവര്‍ണ്ണപ്രീണന കുറുമുന്നണിയെ സാകൂതം വീക്ഷിച്ചു കൊണ്ടിരിക്കുന്ന രാഷ്ട്രീയ പ്രബുദ്ധതയുള്ള ന്യൂനപക്ഷ നിരീക്ഷകരൊക്കെ ലീഗ് നേതൃത്വത്തിന് ജാഗ്രതാ നിര്‍ദേശം നല്കിയെന്നതിന്റെ തെളിവാണ്  ഇ  ടി മുഹമ്മദ്‌ ബഷീര്‍ അടക്കമുള്ളവര്‍ ലീഗിന്റെ മുന്‍കാല രീതി വിട്ടു നിലപാടുകളില്‍ കാര്‍ക്കശ്യത്തിന്റെ സ്വരം ചേര്‍ത്തത്. 

         രമേശ്‌ ചെന്നിത്തല  കോണ്ഗ്രസ്സിനെ സവര്‍ണ്ണ മാടമ്പിമാരുടെ ആലയില്‍ കൊണ്ട് പോയി കെട്ടാനുള്ള ഗൃഹപാഠം ചെയ്തു  തുടങ്ങിയിട്ട് കുറച്ചു കാലമായി. ഒരു ക്രിസ്ത്യാനി എന്ന കുടുസ്സു ചുമരിനപ്പുറം ഒരു  സെകുലര്‍ ജനകീയ നേതാവെന്ന വലിയ ഇമേജ്  ഉമ്മന്‍ ചാണ്ടിക്കുള്ളത് കൊണ്ട് മാത്രം മുഖ്യമന്ത്രിക്ക് വേണ്ടി പെരുന്നയിലെ ആസ്ഥാനത്ത് നിന്നും തുന്നിക്കൊടുത്ത കുപ്പായം മടക്കു നിവര്‍ത്താതെ ചെന്നിത്തലക്ക് തിരിച്ചു വെക്കേണ്ടി വന്നു എന്നതാണ് വാസ്തവം. ചില വിജിലന്‍സ് കേസുകളുടെ കാര്യം വരുമ്പോഴേക്കും ഉമ്മന്‍ ചാണ്ടി മാറി ചെന്നിത്തല മുഖ്യമന്ത്രിയാവും, അല്ലെങ്കില്‍ ഉപമുഖ്യമന്ത്രിയാവും എന്നൊക്കെ ഹോട്ട് ന്യൂസ്‌ പടച്ചു വിടുന്നതിനു പിന്നിലും ഈ കുറുമുന്നണി തന്നെ. അഞ്ചാംമന്ത്രി വിഷയത്തില്‍ ഒത്തുതീര്‍പ്പ് ഫോര്‍മുലകളിലൊന്നായി രമേശ്‌ ചെന്നിത്തല ഉപമുഖ്യമന്ത്രിയായി മന്ത്രിസഭയിലേക്ക് വരും എന്ന രീതിയില്‍ ഒരു കരക്കമ്പി മാധ്യമങ്ങളില്‍ വന്നത്  ശ്രദ്ധിച്ചിരിക്കും. ഹൈക്കമാന്റ് സ്വപ്നത്തില്‍ പോലും കാണാത്ത ഈ ഫോര്‍മുല ഹൈക്കമാന്‍ഡിന്റെ പിരടിക്ക് വെച്ച് കെട്ടി മാധ്യമങ്ങളിലേക്ക് ചര്‍ദ്ദിച്ചതും ഈ കുറുമുന്നണി തന്നെ. കഴിഞ്ഞ എല്‍ ഡി എഫ് ഭരണ കാലത്ത് മീഡിയകളില്‍  ആര്‍ജ്ജവമുള്ള  ഖണ്ഡനങ്ങളിലൂടെ  കോണ്ഗ്രസ്സിനു രാഷ്ട്രീയ മൈലേജ് പകര്‍ന്ന വീ ഡി സതീശന് അര്‍ഹതപ്പെട്ട മന്ത്രിസ്ഥാനം ഹീനമായ ജാതിവെറിയുടെ സമവാക്യത്തിലൂടെ അട്ടിമറിച്ചു വീ എസ് ശിവകുമാറിന് അവസാന നിമിഷം കുറിയിട്ട് നല്‍കിയതിനു പിന്നിലും മറ്റാരുമല്ല. 

         അപ്പോള്‍ പറഞ്ഞു വന്നത് ഇതാണ്. ലീഗിന്റെ പാരമ്പര്യമനുസരിച്ച് ഒഴിവാക്കാമായിരുന്ന ഒരാവശ്യത്തെ അതുന്നയിക്കപ്പെട്ടതിനു ശേഷം ചെന്നിത്തലയുടെയും അച്യുതാനന്ദന്റെയും കൊടിയേരിയുടേയും ബീ ജെ പിയുടെയും സുകുമാരന്‍ നായരുടെയും അജണ്ടാധിഷ്ടിത  മാധ്യമങ്ങളുടെയും കാര്‍മികത്വത്തില്‍ നടന്ന ആസൂത്രിത വര്‍ഗീയ ധ്രുവീകരണ നീക്കങ്ങളെ ചെറുക്കാന്‍ ഉന്നയിച്ച ആവശ്യത്തില്‍ തന്നെ ഉറച്ചു നില്‍ക്കാന്‍ ലീഗിനെ  നിര്‍ബന്ധിതമാക്കി എന്നതാണ്. ഇവിടെ രണ്ടു സാധ്യതകള്‍ പഠന വിധേയമാക്കേണ്ടതുണ്ട്.  

         ഒന്ന്, ലീഗ് അഞ്ചാം മന്ത്രി ആവശ്യം ഉന്നയിച്ച ഉടനെ ഈ സവര്‍ണ്ണ- ന്യൂനപക്ഷ വിരുദ്ധ  ഹാലിളക്കം കണ്ടു ആവശ്യത്തില്‍ നിന്നും പിന്മാറിയിരുന്നെങ്കില്‍ എന്ത് സംഭവിക്കുമായിരുന്നു? മറ്റൊന്നുമല്ല, ഇതൊരു കീഴ്വഴക്കമായി മാറും അത്ര തന്നെ. അതായത് നാളെ ഒരു മന്ത്രിയോ, ചീഫ് സെക്രട്ടറിയോ ഡീ ജി പിയോ മുഖ്യമന്ത്രിയോ ഒക്കെ ആയി ഒരു ന്യൂനപക്ഷക്കാരന്‍ വരാനിടയുണ്ടായാല്‍ ഈയൊരു വിഷരാസക്കൂട്ട്  പൂര്‍വ്വാധികം ശക്തിയോടെ പ്രതിപ്രവര്‍ത്തിക്കും. പിന്നെ പിന്നെ അതൊരു അര്‍ബുദം പോലെ സമൂഹമനസ്സാക്ഷിയിലേക്ക്  പ്രത്യുല്പാദിപ്പിക്കപ്പെട്ടുക്കൊണ്ടേയിരിക്കും. ഒടുക്കം ഈ നാടും ഒരുത്തരേന്ത്യന്‍ സംസ്ഥാനം പോലെ ഭരിക്കാന്‍ ഒരു വര്‍ഗ്ഗവും ഭരിക്കപ്പെടാന്‍ മറ്റൊരു വര്ഗ്ഗവുമെന്ന തട്ട് സാമൂഹിക വ്യവസ്ഥയിലേക്കു മടങ്ങിപ്പോകും. 

        രണ്ടാമതൊരു സാധ്യത, കാലങ്ങളായി ലീഗ് പുലര്‍ത്തിപ്പോന്ന വിട്ടുവീഴ്ചയുടെയും സഹവര്‍ത്തിത്തത്തിന്റെയും സമീപനം ഈ വിഷയത്തിലും  കാണിച്ചു അവസാനം ഒരു ഒത്തു തീര്‍പ്പ് ഫോര്‍മുലയിലൂടെ മറ്റേതെങ്കിലും ഒരു പദവി സ്വീകരിച്ചു ഇതിനെ രഞ്ജിപ്പിലെത്തിക്കുക  എന്നതായിരുന്നു. ഏറ്റവും മാതൃകാപരവും ലീഗിനെ സ്നേഹിക്കുന്ന ഭൂരിപക്ഷവും ആഗ്രഹിച്ചിരുന്ന ഒരു രീതിയായിരുന്നു അത്. പക്ഷെ ഹൈദരലി ശിഹാബ് തങ്ങളുടെ അടുത്ത് നിന്നും അവസാനം അതുണ്ടായില്ല എന്നതു ലീഗിന്റെ വ്യതിരക്തതയെ ബഹുമാനപൂര്‍വ്വം കാണുന്നവരില്‍ വല്ലാത്ത നിരാശയുണ്ടാക്കി എന്നതാണ് സത്യം. 


          ഇവിടെ പ്രിയപ്പെട്ട ലീഗ് പ്രവര്‍ത്തകര്‍ ശ്രദ്ധിക്കേണ്ടതായ ഒരു കാര്യം കൂടിയുണ്ട്. ഹൈദരലി ശിഹാബ് തങ്ങള്‍ മുസ്ലിം ലീഗ് എന്ന രാഷ്ട്രീയ പാര്‍ട്ടിയെ സംബന്ധിച്ചിടത്തോളം പാര്‍ട്ടിയുടെ സംസ്ഥാന അധ്യക്ഷനാണ്.  അതിനപ്പുറം അദ്ദേഹം ആര്‍ക്കെങ്കിലും ആത്മീയ നേതാവാണെന്നത്  അംഗീകരിച്ചു കൊണ്ട്  തന്നെ ആ സ്ഥാനം ലീഗിന്റെ രാഷ്ട്രീയ സ്പേസിനു പുറത്തു നില്‍ക്കുന്ന കാര്യമാണ്. ഇതേ കാര്യം വര്‍ഷങ്ങള്‍ക്കു മുമ്പ് കെ എം ഷാജി യൂത്ത് ലീഗ് ഭാരവാഹി ആയിരിക്കെ വയനാട് വെച്ച് പത്രക്കാരുടെ ചോദ്യത്തിനു മറുപടി ആയി പറഞ്ഞിരുന്നു. അന്ന് ഷാജിക്കെതിരെ ഒരു പാട് പേര്‍, കുഞ്ഞാലിക്കുട്ടി അടക്കം, വാളോങ്ങിയത്‌ ഇത്തരുണത്തില്‍ ഓര്‍ക്കേണ്ടതുമാണ്.  എന്ത് കൊണ്ട് പാണക്കാട് കുടുംബം ഇതര രാഷ്ട്രീയ പാര്‍ട്ടി നേതൃത്വത്തില്‍ നിന്നും വ്യതിരക്തമായി നില്‍ക്കുന്നുവെന്നും ജാതി മത രാഷ്ട്രീയ  ഭേദമന്യേ സര്‍വ്വരും ആദരിക്കുന്ന വ്യക്തി പ്രഭാവം അവര്‍ക്കൊക്കെ എങ്ങനെ കൈവരുന്നുവെന്നും പഠിക്കേണ്ട വിഷയമാണ്. അതവരുടെ ആത്മീയ മണ്ഡലത്തിന്റെ ബാക്കി പത്രമല്ല, മറിച്ച്, ഇതര രാഷ്ട്രീയ നേതാക്കളെപ്പോലെ അധികാരത്തിന്റെ ചക്കരക്കുടത്തില്‍ കയ്യിട്ടു വാരാന്‍ ആ കുടുംബത്തിലെ ആരും, അതിനു ഏറെ അവസരമുള്ളവരായിട്ടു പോലും, ഒരിക്കലും വരുന്നില്ല എന്നതിലാണ്. പൂക്കോയ തങ്ങളും മുഹമ്മദലി ശിഹാബ് തങ്ങളും ഹൈദരലി ശിഹാബ് തങ്ങളുമൊക്കെ അധികാര ശീതളിമയില്‍ നിന്നും മാറി നിന്ന് ഈ സംഘശക്തിയെ നയിച്ചവരും നയിക്കുന്നവരുമാണ്.  ഹൈദരലി ശിഹാബ് തങ്ങളുടെ വാക്ക് പാലിക്കപ്പെടാനുള്ളതാണെന്നു അപക്വമായി  നിര്‍ബന്ധം കാണിച്ചവരോട് ഹൈദരലി തങ്ങള്‍ക്കു തന്നെ പറയാമായിരുന്നു, എന്റെ വാക്ക് ഒരു വേദവാക്യമല്ല, മറിച്ച്  വിട്ടുവീഴ്ചയുടെ സ്വരമാണ് ഈ സംഘടിത  മുന്നേറ്റത്തിന്റെ ഇത്രയും  കാലത്തെ ഊര്‍ജ്ജമെന്നും. അവിടം കൊണ്ട് തീരുമായിരുന്ന ഈ പ്രശ്നത്തെ ഇത്ര വഷളാക്കി നിര്‍ത്തിയതിനു കാലം എന്താണ് ഈ നേതൃത്വത്തിനു കരുതി വെച്ചിട്ടുണ്ടാവുക എന്നത്  കാത്തിരുന്നു കാണേണ്ടതാണ്.   

          മുസ്ലിംലീഗ് ഒരു കവചമാണ്. സംഘശക്തിയും അധികാര പങ്കാളിത്തവുമില്ലാത്തിടത്തു, അത് ഫാഷിസ്റ്റ്കളുടെയോ കമ്മ്യുണിസ്റ്റ്കാരുടെയോ ഭരണകൂടമാകട്ടെ, അവിടെ ന്യൂനപക്ഷക്കാരനും ഈഴവനും അവര്‍ണ്ണനും പിന്നോക്കക്കാരനും കീഴാളനും ഒക്കെയും ഭരണകൂട ഭീകരതയുടെ ഇരയും വെപ്പാട്ടിയുമായി കഴിയേണ്ടി വരുമെന്നതിന് കാലം സാക്ഷിയാണ്. മതവും ജാതിയും ഉപജാതിയും വര്‍ണ്ണവുമെല്ലാം സാമൂഹ്യസത്യങ്ങളായിരിക്കുന്നിടത്തോളം കാലം നമ്മള്‍ ഉട്ട്യോപ്പകളെക്കുറിച്ച് വാചാലമാകുന്നതില്‍ അര്‍ത്ഥമില്ല, മറിച്ച് ഈ അധസ്ഥിത അവശ ജനവര്‍ഗത്തെ മതേതര ചേരിയില്‍ വരിചേര്‍ത്ത് ജനാധിപത്യത്തിന്റെ ആയുധങ്ങളുപയോഗിച്ചു  അധികാരത്തിന്റെ അരമനകളിലെത്തിച്ചു അവര്‍ക്ക് സാമൂഹ്യനീതിയുടെ കവാടങ്ങള്‍ എവിടെയും കൊട്ടിയടക്കപ്പെടുന്നില്ല എന്നുറപ്പ് വരുത്തുന്ന ഒരു വ്യവസ്ഥിതിയായി ഈ സ്വത്വസംഘടിത രാഷ്ട്രീയം ഇവിടെ നിലനില്‍ക്കുക തന്നെ വേണം .

         ഏതായാലും  ഈ അഞ്ചാംമന്ത്രി വിവാദം  ബാക്കിവെച്ച  ഏക  ഗുണഫലം എന്നത് സെകുലര്‍ കുപ്പായത്തിനകത്തു പുഞ്ചിരിച്ചു നില്‍ക്കുന്ന കുറെ കള്ളനാണയങ്ങളുടെ സവര്‍ണ്ണതയുടെ കാവിനിറം പുറത്തു വരാനുള്ള  ഒരു ലിറ്റ്മസ് ടെസ്റ്റിനു  ഇത് കാരണമായി എന്നതാണ്. സാമുദായിക സന്തുലനം എന്നത്  ലീഗിനൊരു അഞ്ചാം മന്ത്രി വരുന്നതോടെ ഒലിച്ചു പോകുന്ന ഒരു കേവല മിത്താണെന്ന്  ഇദംപര്യന്തമുള്ള സ്ഥിതിവിവരക്കണക്കുകളെയൊക്കെ പരിഹസിച്ച്    കേരളീയന്റെ രാഷ്ട്രീയ പ്രബുദ്ധതയുടെ മുഖത്ത് നോക്കി സ്ഖലിച്ച ഇത്തരക്കാരെ കൂടി ഒന്ന് കോര്‍ണര്‍ ചെയ്തു കൈകാര്യം ചെയ്യാന്‍ ഈയൊരു വിവാദം നിമിത്തമാകും എന്ന് മാത്രം. 

വാല്‍ക്കഷ്ണം: മന്ത്രിമാരായ അലിയും അനൂപും മികച്ച ജനക്ഷേമ പ്രവര്‍ത്തനങ്ങളിലൂടെ പെരുന്നയിലും പരിസരത്തുമൊക്കെയുള്ള എട്ടുകാലി മമ്മൂഞ്ഞിമാരുടെ കണ്ണ് തുറപ്പിക്കുമെന്ന് ആശംസിക്കാംല്ലേ . ശുഭം...   

14 comments:

  1. ചിലപ്പോ നന്നായാലോ....?

    ReplyDelete
  2. http://anilphil.blogspot.com/2012/04/blog-post.html

    inviting everybody to read this article too

    ReplyDelete
  3. നല്ല ലേഖനം ..ആശംസകള്‍

    ReplyDelete
  4. ഹൈദരലി തങ്ങള്‍ വിചാരിച്ചാല്‍ തീര്‍ച്ചയായും ഒഴിവാക്കാമായിരുന്ന ഒരാവശ്യം, പക്ഷെ താല്പര്യാധിഷ്ടിത മീഡിയകളും കൊണ്ഗ്രസ്സിനകത്തു രൂപം കൊണ്ട ചില സവര്‍ണ കുറുമുന്നണിയും ഇതിനെ വര്‍ഗീയവല്ക്കരിക്കാന്‍ ശ്രമിച്ചത്
    ഈയൊരു രാഷ്ട്രീയ പ്രശ്നത്തിന്റെ തലം തന്നെ മാറ്റിക്കളഞ്ഞു എന്നതാണ്. ഏതായാലും രമേശ്‌ ചെന്നിത്തലയുടെ നേതൃത്വത്തില്‍ രൂപം കൊണ്ടിട്ടുള്ള ഈ കുറുമുന്നണിയെ കോര്‍ണര്‍ ചെയ്തു കൈകാര്യം ചെയ്യാന്‍ ഈ വിവാദം അവസരം നല്‍കുമെന്ന് ഞാന്‍ മുകളില്‍ പറഞ്ഞിരുന്നു. ഇപ്പൊ അത് ഉണ്ടാവുകയും ചെയ്തു. ഉപമുഖ്യമന്ത്രി, ആഭ്യന്തരം, മുഖ്യമന്ത്രി, ഇങ്ങനെ ഇടയ്ക്കിടയ്ക്ക് സ്വയം ഫോര്‍മുലകള്‍ പടച്ചു കുപ്പായം തുന്നിയിരുന്ന രമേശ്‌ ചെന്നിത്തലയെയോ അദ്ധേഹത്തിന്റെ കീഴിലുള്ള സവര്‍ണ്ണകുറുമുന്നണിയെയോ ഒരു വാക്ക് പോലും അറിയിക്കാതെ ചെന്നിത്തലക്ക് പെരുന്നയില്‍ നിന്നും തയ്ച്ചു കൊടുത്തു റെഡിയാക്കി വെച്ച ആഭ്യന്തരക്കുപ്പായം ഒരീച്ച പോലും അറിയാതെ തിരുവഞ്ചൂര്‍ രാധാകൃഷ്ണന്‍ എന്ന ചൊറുക്കില്ലാത്ത നായര്‍ക്കു കൊടുത്തു മന്ത്രിസഭയിലെ രണ്ടാമനാക്കിയ ഉമ്മന്‍ ചാണ്ടിയുടെ ഈ കോര്‍ണര്‍ ചെയ്യുന്ന കൈകാര്യം ചെയ്യല്‍ കൊണ്ഗ്രസ്സിനകത്തു ഈ അപകടത്തെ നിര്‍വീര്യമാക്കാന്‍ ആളുണ്ട് എന്ന ആശ്വാസവും നല്‍കുന്നു.
    ഇതിനെക്കാളൊക്കെ ഏറെ പരിഹാസ്യമായത് സീ പീ എമ്മിന്റെ നിലപാടാണ്. അഞ്ചാം മത്രി വിഷയത്തെ വര്‍ഗീയമായി ചാനലൈസ് ചെയ്യാന്‍ വീ എസും കോടിയേരിയും ശ്രമിച്ചതിനു തൊട്ടു പിന്നാലെ എം വിജകുമാര്‍ പെരുന്നയിലെ സുകുമാരന്‍ നായരുടെ ആസ്ഥാനത് പോയി ചര്‍ച്ച ചെയ്തു നെയ്യാറ്റിന്‍കരയില്‍ എന്‍ എസ് എസ് മാറി ചിന്തിക്കും എന്നൊരു പ്രസ്താവനയും നടത്തിക്കളഞ്ഞു! ഇത്തരക്കാരാണ് ഇവിടെ ബദല്‍ എന്നതാണ് ഏറ്റവും വലിയ നാണക്കേട്‌.

    ReplyDelete
  5. അപ്പോള്‍ നീ പറഞ്ഞു വന്നത് ലീഗിന്റെ മുലകള്‍-ഫോര്‍മുലകള്‍ തെറ്റിയതുകൊണ്ടാണ്‌ അഞ്ചാം മന്ത്രി വിവാദം ഉണ്ടായത് എന്നാണോ?
    ലീഗ്-കോണ്‍ഗ്രസ് കൊടുക്കല്‍ വാങ്ങലിനകത്തെ പാളിച്ചകളാണ്‌ സംഭവം എന്നാണോ? അറിഞ്ഞിടത്തോളം, ലീഗിന്റെ കയ്യിലുണ്ടായിരുന്ന വകുപ്പുകള്‍ പിന്നെയും വീതം വച്ചാണ്‌
    അലിയെ പച്ചപിടിപ്പിച്ചത് എന്നാണ്‌. ഇതില്‍ എന്തോ ചേര്‍ച്ചക്കുറവ് ഇല്ലേ. ഒരാള്‍ക്കെടുക്കാവുന്ന പണീ ഒമ്പതാളെക്കൊണ്ട് ചെയ്യിക്കുന്നതിന്റെ ഒരു ചേര്‍ച്ചക്കുറവ്.
    സാമുദായികരഷ്ട്രീയ ബലാബലം തുല്യമാക്കാന്‍ ഇങ്ങനൊക്കെ വേണം എന്നായിരിക്കും.
    വേറൊന്ന് "സംഘശക്തിയും അധികാര പങ്കാളിത്തവുമില്ലാത്തിടത്തു, അത് ഫാഷിസ്റ്റ്കളുടെയോ കമ്മ്യുണിസ്റ്റ്കാരുടെയോ ഭരണകൂടമാകട്ടെ, അവിടെ ന്യൂനപക്ഷക്കാരനും ഈഴവനും അവര്‍ണ്ണനും പിന്നോക്കക്കാരനും കീഴാളനും ഒക്കെയും ഭരണകൂട ഭീകരതയുടെ ഇരയും വെപ്പാട്ടിയുമായി കഴിയേണ്ടി വരുമെന്നതിന് കാലം സാക്ഷിയാണ്."
    കോണ്‍ഗ്രസ്സിനെ നീ എവിടെപ്പെടുത്തും. മനപ്പൂര്‍‌വ്വം മറന്നതാണോ? ഈഴവന്‍, അവര്‍ണ്ണന്‍, പിന്നോക്കക്കാരന്‍, കീഴാളന്‍-എടുത്തു പ്രയോഗിക്കുന്നുണ്ട് വാക്കുകള്‍. ഈഴവന്‍ ജാതിയാണെന്ന് മനസ്സിലായി. ബാക്കിയൊക്കെ എന്താണ്‌? പര്യായം എഴുതി കളിച്ചതാണോ?
    വേറൊരപകടം ഉള്ളത്
    പച്ച പോലെ കാവിയും ഒരു നിറമാണെന്നും അത് നിറം മാത്രമല്ലെന്നും ആളുകള്‍ ചിന്തിച്ചു തുടങ്ങിയാല്‍ തടയാന്‍ പറ്റിയെന്നു വരില്ല. ജാതിസമുദായക്കൊടികളുടെ കീഴില്‍ സംഘടിക്കുന്നതിലെ അനിവാര്യമായ ഒരു ലോജിക്കല്‍ പ്രശ്നം കൂടിയാണ്‌ അത്. സ്വത്വം എല്ലാവര്‍‌ക്കും ഉള്ളതുകൊണ്ടുണ്ടാകുന്ന ഒരു പ്രശ്നം.
    സെക്കുലര്‍ എന്നത് ചുമ്മാ പറയണാതല്ലേ. സ്ഥാനാര്‍ഥി നിര്‍ണ്ണായിക്കുംമ്പോള്‍ രാഷ്ട്രീയപ്പാര്‍ട്ടികളൂം കല്യാണം കഴിക്കണം എന്നാകുമ്പോള്‍ വ്യക്തികളൂം മറന്നു വയ്ക്കുന്ന ഒരു സാധനം അല്ലേ ഈ സെക്കുലര്‍.

    ReplyDelete
  6. ഷിനോദേ,
    പാര്‍ട്ടിയുടെ ആന്തരിക പൊളിറ്റിക്സിന്റെ ഭാഗമായി ഉണ്ടായ ഒരു വിഷയത്തെ മുസ്ലിം മന്ത്രി, നായര്‍ മന്ത്രി, ക്രിസ്ത്യന്‍ മന്ത്രി എന്ന രീതിയിലേക്ക് വഴി തിരിച്ചുവിട്ടു എന്ന കാര്യമാണ് ഞാന്‍ ചൂണ്ടിക്കാണിച്ചത്.
    പിന്നെ ഭരണകൂട ഭീകരതയുടെ കാര്യത്തില്‍ കോണ്ഗ്രസ്സിനെ മനപ്പൂര്‍വം ഒഴിവാക്കിയതൊന്നുമല്ല. ചരിത്രം നോക്കിയാല്‍ താരതമ്യേന മൈല്‍ഡും ഫ്ലക്സിബിളിറ്റിയുമുള്ള, ഒരു കേഡര് ‍സ്വഭാവ ഭീകരതയില്ലാത്ത ഒരാള്‍ക്കൂട്ടമനശാസ്ത്രമാണ് കോണ്ഗ്രസ്സിന്റെത് എന്ന് കാണാം (സിക്ക് കൂട്ടക്കൊലയും അടിയന്തിരാവസ്ഥയുമൊന്നും മറക്കുന്നില്ല).
    ഈഴവര്‍, പിന്നോക്കക്കാരന്‍, കീഴാളന്‍, അവര്‍ണ്ണന്‍ എന്നൊക്കെ പ്രയോഗിച്ചത് ഒരു പ്രാസമൊപ്പിക്കാന്‍ വേണ്ടിയല്ല. മറിച്ച് ഈ ഓരോ ക്ലാസ്സിനും ഭരണകൂടങ്ങള്‍ ചവിട്ടിയരച്ച വ്യത്യസ്ത കഥകള്‍ സ്വന്തമായി പറയാനുണ്ട് എന്നത് കൊണ്ട് തന്നെ. ഈഴവന്‍
    ഒരു ജാതിയാണ്. പക്ഷെ രാഷ്ട്രീയ ഭീകരതയുടെ ഭാഗമായി ഉണ്ടാവുന്ന മിക്ക അറുംകൊലകളിലും ഇരുപക്ഷത്തും രക്തസാക്ഷികളാവാന്‍ ഈഴവന് മാത്രം എന്ത് കൊണ്ട് ബലി മൃഗമാക്കപ്പെടുന്നു എന്ന്
    ഷിനോദ് വിശദീകരിച്ചാല്‍ നന്നായിരുന്നു. കേരളം മാത്രമെടുത്താല്‍ വടക്ക് നിന്ന് തെക്കോട്ട്‌ പോകുമ്പോള്‍ കാണുന്ന രക്തസാക്ഷി/ബലിദാനി സ്തൂപങ്ങളൊക്കെയും എന്ത് കൊണ്ട് ഈഴവന്റെതാകുന്നു?
    ഇനി കീഴാളന്‍ എന്നത്, സമൂഹത്തിന്റെ താഴെ തട്ടിലുള്ള എല്ലാ വിഭാഗങ്ങളും, ഒരു പ്രത്യേക ജാതിയെന്നൊന്നുമില്ല, അവര്‍ മാനസികമായി തന്നെ സാമൂഹികാടിമത്തങ്ങള്‍ക്ക് വിധേയപ്പെട്ടു ജീവിക്കുന്ന ഒരു വിഭാഗമാണ്‌. അവരെ ചൂഷണം ചെയ്യുക എന്നത് സാര്‍വലൌകികമായി സകല രാഷ്ട്രീയ പാര്‍ട്ടികളും സ്വീകരിച്ചു വരുന്ന ഒരു നയവും.
    അവര്‍ണ്ണന്‍ എന്നത് ഒരു സാമൂഹിക ചേരിയാണ്. ജന്മകുലത്തിന്റെ മഹിമയില് ഉന്നതരാക്കപ്പെട്ട സവര്‍ണ്ണ മേധാവിത്വത്തിന്റെ ലക്ഷ്മണ രേഖയ്ക്ക് പുറത്തു നില്‍ക്കുന്ന ഒരു ബഹുജനം, അതില്‍ മുന്നേ പറഞ്ഞ എല്ലാ വിഭാഗങ്ങളും ഉള്‍കൊള്ളാം . ‍ ന്യൂനപക്ഷവും പിന്നോക്കക്കാരനും എന്നത് മതവിശ്വാസത്തിന്റെയും വിദ്യാഭ്യാസ സാമൂഹിക സാമ്പത്തിക മാനദണ്ഡങ്ങളുടെയും പേരില്‍ മുഖ്യധാരയില്‍ നിന്നും ഉന്മൂലനം ചെയ്യപ്പെടാന്‍ ഭരണകൂടങ്ങളാല്‍ കാലങ്ങളായി ടാര്‍ഗെറ്റ് ചെയ്യപ്പെട്ട ഒരു വിഭാഗം. ഇവരൊക്കെയും രാഷ്ട്രീയമായി സമുദ്ധരിക്കപ്പെടുമ്പോള്‍ മുഖ്യകക്ഷികള്‍ക്ക് വല്ലാത്ത അസ്വസ്ഥതകള്‍ ‍ ഉണ്ടാകുന്നു.
    ബദലില്ലാത്തപ്പോഴും മുഖ്യധാരാകക്ഷികള്‍ ഈ പറഞ്ഞ വിഭാഗങ്ങളുടെ താല്‍പര്യങ്ങളെക്കൂടി വിശ്വാസത്തിലെടുക്കുന്നത് വരെ ഈ സ്വത്വ പ്രതിസന്ധിക്ക് അവര്‍ തന്നെ സ്വന്തമായി രാഷ്ട്രീയ പരിഹാരം കാണുക തന്നെ ചെയ്തു കൊണ്ടിരിക്കും.
    പിന്നെ സെകുലര്‍ എന്നത് പൊതുമണ്ഡലത്തിലുള്ള ഇടപെടലിന്റെ രീതിശാസ്ത്രവുമായി ബന്ധപ്പെട്ടതാണ്., അല്ലാതെ പേരിലും കൊടിയിലുമൊക്കെ പ്രത്യേകമായി സെകുലര്‍ എന്നൊട്ടിച്ചു വെച്ചാലേ ഈ കൂട്ടായ്മകളൊക്കെയും
    സെകുലര്‍ ആകൂ എന്ന് ശഠിക്കുന്നതില്‍ കാര്യമില്ല തന്നെ.

    ReplyDelete
  7. ഇതേ വിഷയത്തില്‍ സീ ദാവൂദ് 'മാധ്യമത്തില്‍ 'എഴുതിയ ലേഖനം താഴെ...


    അഞ്ചാം മന്ത്രിയും സമുദായ സന്തുലന സിദ്ധാന്തവും
    =================================
    സീ ദാവൂദ് (മാധ്യമം)

    ജേക്കബിനെ മന്ത്രിയാക്കുന്നതില്‍ വരുത്തുന്ന കാലവിളംബം പിറവത്തെ വോട്ടര്‍മാരോട് കാണിക്കുന്ന വഞ്ചനയാണെന്ന് എന്‍.എസ്.എസ് ജനറല്‍ സെക്രട്ടറി ജി. സുകുമാരന്‍ നായര്‍ പ്രസ്താവിച്ചത് ഏപ്രില്‍ നാലിനാണ്. അതേ സുകുമാരന്‍ നായര്‍ തന്നെയാണ് അനൂപിനെയും മഞ്ഞളാംകുഴി അലിയെയും മന്ത്രിമാരാക്കാനുള്ള യു.ഡി.എഫ് തീരുമാനം വന്നപ്പോഴേക്ക് സാമാന്യ മര്യാദ ഉപേക്ഷിച്ച് പച്ച വര്‍ഗീയവാദം ചാനലുകളിലൂടെ വിളിച്ചു പറയാന്‍ തുടങ്ങിയത്. സംസ്ഥാന ചരിത്രത്തിലാദ്യമായി മന്ത്രിസഭയില്‍ ന്യൂനപക്ഷ സമുദായാംഗങ്ങള്‍ ഭൂരിപക്ഷമായിരിക്കുന്നു, അതിനാല്‍ കേരളം തകരാന്‍ പോകുന്നുവെന്ന മട്ടിലായിരുന്നു അദ്ദേഹത്തിന്റെ ആക്രോശങ്ങള്‍. അനൂപ് ജേക്കബ് എന്ന ന്യൂനപക്ഷക്കാരനെ വിജയിപ്പിക്കാന്‍ ഉത്സാഹിക്കുകയും വിജയിച്ചപ്പോള്‍ മന്ത്രിയാക്കാന്‍ ആവേശം കാണിക്കുകയും ചെയ്ത സുകുമാരന്‍ നായര്‍ ഇപ്പോള്‍ സന്തുലനത്തെക്കുറിച്ച് ബഹളം വെക്കുമ്പോള്‍ അതിനെന്താണര്‍ഥം? ന്യൂനപക്ഷമല്ല, മറിച്ച് ഒരു മുസ്ലിം സമുദായക്കാരന്‍ മന്ത്രിയായി എന്നതാണ് സുകുമാരന്‍ നായരുടെ അടിസ്ഥാന പ്രശ്നം എന്നാണിത് കാണിക്കുന്നത്. സുകുമാരന്‍ നായര്‍ വെടിപൊട്ടിച്ചപ്പോഴേക്ക് അതേറ്റെടുക്കാന്‍ കോണ്‍ഗ്രസും കമ്യൂണിസ്റ്റും ബി.ജെ.പിയുമെല്ലാം ഒന്നിക്കുന്നതാണ് പിന്നീട് കണ്ടത്. ഈ ബഹളങ്ങള്‍ക്ക് മാധ്യമങ്ങള്‍ നല്ല കവറേജും നല്‍കി. ഭ്രാന്തമായ വര്‍ഗീയതയിലേക്ക് കേരളീയ രാഷ്ട്രീയം പോകുന്നുവോയെന്ന് ഭയന്നുപോയ സന്ദര്‍ഭം.
    യഥാര്‍ഥത്തില്‍ എന്താണ് സംഭവിച്ചത്? സമുദായ സന്തുലനം തകരുന്നുവെന്നതാണ് പ്രശ്നമെങ്കില്‍ അത് ആദ്യത്തെ സംഭവമൊന്നുമല്ലല്ലോ. കേരളപ്പിറവി മുതലിങ്ങോട്ടുള്ള സംസ്ഥാന മന്ത്രിസഭകള്‍ നമ്മളെടുത്തു പരിശോധിക്കുക; സുകുമാരന്‍ നായര്‍ നടത്തിയതുപോലുള്ള ജാതികീറല്‍ ഓരോ മന്ത്രിസഭയെക്കുറിച്ചും നടത്തുക; ഇത്രയും കാലം ഏതെല്ലാം ജാതി/സമുദായക്കാര്‍ മുഖ്യമന്ത്രിമാരും മന്ത്രിമാരുമായി, എന്തെല്ലാം പദവികള്‍ ഏതെല്ലാം സമുദായങ്ങള്‍ക്ക് എത്ര അളവില്‍ നല്‍കി എന്നൊരു പരിശോധന. പുതിയ സന്തുലന സിദ്ധാന്ത പ്രകാരം അവയെ പട്ടിക തിരിക്കുക -ഇപ്പോള്‍ സമുദായ സന്തുലനത്തിന് വേണ്ടി വാദിക്കുന്നവര്‍ അതിന് സന്നദ്ധരാവുമോ? അങ്ങനെ അസന്തുലിതമായി /കൂടുതല്‍ പദവികള്‍ നേടിയ സമുദായങ്ങള്‍ പ്രായശ്ചിത്തം ചെയ്ത് പദവികള്‍ മറ്റ് സമുദായങ്ങള്‍ക്ക് വിട്ടുകൊടുക്കാന്‍ സന്നദ്ധമാവുമോ? വേണ്ട; ചരിത്രത്തിലേക്കൊന്നും പോവേണ്ടതില്ല, മഞ്ഞളാംകുഴി അലി എന്നൊരാള്‍ മന്ത്രിയായപ്പോഴാണല്ലോ സര്‍വതാളവും തെറ്റിയതായി എല്ലാവരും വ്യാഖ്യാനിക്കുന്നത്. അലിയെ മാറ്റിനിര്‍ത്തിയാലുള്ള മന്ത്രിസഭയുടെ സന്തുലനമെന്താണ്? കേരളത്തില്‍ 20 ശതമാനം മാത്രമാണ് ക്രിസ്ത്യന്‍ സമൂഹം. മുഖ്യമന്ത്രിയടക്കം ആറ് മന്ത്രിമാരും ഡെപ്യൂട്ടി സ്പീക്കറും കാബിനറ്റ് പദവിയുള്ള ചീഫ് വിപ്പും ആ സമൂഹത്തില്‍ നിന്നാണ്; കൂടാതെ യു.ഡി.എഫ് കണ്‍വീനര്‍ സ്ഥാനവും ക്രിസ്ത്യന്‍ സമുദായത്തിന് തന്നെ. ഇതില്‍ ആര്‍.എസ്.പി ബിയുടെ ഷിബു ബേബിജോണ്‍ (ലാറ്റിന്‍ ക്രിസ്ത്യന്‍), ഡെപ്യൂട്ടി സ്പീക്കര്‍ എന്‍. ശക്തന്‍ (നാടാര്‍ ക്രിസ്ത്യന്‍) എന്നിവര്‍ ഒഴികെ ബാക്കിയെല്ലാവരും സവര്‍ണ ക്രിസ്ത്യാനികള്‍. സന്തുലന സിദ്ധാന്തത്തിന്റെ ഉപജ്ഞാതാവായ സുകുമാരന്‍ നായരുടെ സമുദായം 12 ശതമാനം വരും. നാല് മന്ത്രിമാരും സ്പീക്കറും ആ സമുദായത്തില്‍ നിന്ന്; കൂടാതെ കെ.പി.സി.സി പ്രസിഡന്റും നായര്‍ തന്നെ. അതായത്, സവര്‍ണ നായന്മാരും സവര്‍ണ ക്രിസ്ത്യാനികളും ചേര്‍ന്ന് മന്ത്രിസഭയുടെ പകുതിയും നിറഞ്ഞിരിക്കുന്നു. എന്നാല്‍, 25 ശതമാനത്തിലേറെയുള്ള മുസ്ലിം സമുദായത്തില്‍ നിന്ന് അഞ്ച് മന്ത്രിമാര്‍; അലി വരുമ്പോള്‍ അത് ആറാവുന്നു. അപ്പോഴേക്ക് സംസ്ഥാനത്തിന്റെ സാമുദായിക സന്തുലനം അടിമേല്‍ മറിയുമെന്നാണ് സവര്‍ണ ജാതി മേധാവികള്‍ ഇപ്പോള്‍ വ്യാപകമായി പ്രചരിപ്പിക്കുന്നത്. 12 ശതമാനം വരുന്ന നായന്മാര്‍ അഞ്ച് പദവികള്‍ കൈവശം വെക്കുമ്പോള്‍ 26 ശതമാനം വരുന്ന ഈഴവര്‍ക്ക് രണ്ട് മന്ത്രിമാര്‍ മാത്രം. എന്നിട്ടും സന്തുലനത്തെക്കുറിച്ച് സിദ്ധാന്തം പറയുന്നത് നായര്‍ സര്‍വീസ് സൊസൈറ്റിയും. 1960ല്‍ ആര്‍. ശങ്കറിനെ തഴഞ്ഞ് പട്ടം താണുപിള്ളയെ മുഖ്യമന്ത്രിയാക്കാന്‍ മന്നത്ത് പത്മനാഭന്‍ നടത്തിയ അതേ കുസൂത്രങ്ങള്‍ തന്നെയാണ് ഇപ്പോഴും പ്രയോഗിക്കപ്പെടുന്നത്. ഇത് മനസ്സിലാവാതെ പാവം നടേശ മുതലാളിയും സുകുമാരന്‍ നായരുടെ സൃഗാല തന്ത്രത്തില്‍ വീണുപോയി. (Continues....)

    ReplyDelete
    Replies
    1. (Continues>..) സന്തുലന മാപിനി വെച്ചുള്ള കളി കാബിനറ്റും കടന്ന് മുസ്ലിം ലീഗ് മന്ത്രിമാരുടെ പേഴ്സനല്‍ സ്റ്റാഫിലേക്ക് വരെ പോയി. ലീഗ് മന്ത്രിമാരുടെ സഹായികളുടെ സമുദായം നോക്കി സെക്രട്ടേറിയറ്റില്‍ മുസ്ലിം സൂനാമി എന്ന പ്രതീതി സൃഷ്ടിക്കാനായിരുന്നു ശ്രമം. പക്ഷേ, ഈ കണക്കെടുപ്പ് അത്ര പെട്ടെന്ന് നിര്‍ത്തരുതായിരുന്നു. എല്ലാ മന്ത്രിമാരുടെയും പേഴ്സനല്‍ സ്റ്റാഫ്, വിവിധ വകുപ്പുകളുടെ സെക്രട്ടറി, അണ്ടര്‍ സെക്രട്ടറി തുടങ്ങിയ പദവികള്‍, പൊലീസ് വകുപ്പിലെ ഉന്നത ഉദ്യോഗസ്ഥന്മാര്‍ തുടങ്ങി എല്ലാ തലത്തിലും ഇങ്ങനെയൊരു കണക്കെടുപ്പ് നടത്തുകയായിരുന്നു വേണ്ടത്. എന്നല്ല, പിന്നാക്ക സംഘടനകള്‍ കാലങ്ങളായി ഉയര്‍ത്തുന്ന ഒരാവശ്യമാണ് ഇത്തരത്തിലുള്ളൊരു കണക്കെടുപ്പ്. അത് ലീഗ് മന്ത്രിമാരുടെ പേഴ്സനല്‍ സ്റ്റാഫില്‍ മാത്രം പരിമിതപ്പെടുത്തി അവസാനിപ്പിച്ചത് എന്തുകൊണ്ടാണ്?
      സുകുമാരന്‍ നായര്‍ ഇത്തരം പ്രചാരണം നടത്തുന്നത് മനസ്സിലാക്കാന്‍ കഴിയും. നൂറ്റാണ്ടുകളായി പിന്നാക്കക്കാരെ അടിച്ചമര്‍ത്തി ഭരിച്ചിരുന്ന പഴയ ആഢ്യബോധത്തില്‍ നിന്ന് മുക്തനാകാന്‍ അദ്ദേഹത്തിന് ഇനിയും സാധിച്ചിട്ടില്ല. കാലങ്ങളായി അധികാരത്തിന്റെ അചോദ്യ മാര്‍പ്പാപ്പയായി വിലസിയതിന്റെ ഗര്‍വ് നിറഞ്ഞ പാരമ്പര്യമാണ് അദ്ദേഹത്തിന്റെ ഓരോ വാക്കിലും പുറത്തേക്ക് തെറിക്കുന്നത്. അടുത്ത കാലത്തായി പിന്നാക്ക, ന്യൂനപക്ഷ വിഭാഗങ്ങളിലുണ്ടായ ഉണര്‍വുകളും തിരിച്ചറിവുകളും ഈ അധികാര ഗര്‍വിനെ ചെറുതായി പ്രഹരിക്കാന്‍ തുടങ്ങിയിട്ടുണ്ട്. അതാണ് സുകുമാരന്‍ നായരുടെ നേതൃത്വത്തിലുള്ള സവര്‍ണ ലോബിയെ അസ്വസ്ഥപ്പെടുത്തുന്നത്. യഥാര്‍ഥത്തില്‍ വളരെ ലളിതമായി തീര്‍ക്കാമായിരുന്ന 'അഞ്ചാം മന്ത്രി' പ്രശ്നം ഇത്രയും സങ്കീര്‍ണമാവാന്‍ കാരണം സവര്‍ണ ലോബിയുടെ പിടിവാശിയും അധികാര ഹുങ്കുമാണ്.(continues...)

      Delete
    2. (Continues..>)ജാതി രാഷ്ട്രീയം ഇന്ത്യയില്‍ വളരുന്നുവെന്നത് 'പുരോഗമനവാദികള്‍' വലിയ പരാതിയായി ഉന്നയിക്കാറുണ്ട്. യഥാര്‍ഥത്തില്‍ ഇന്ത്യയില്‍ എന്നും ജാതി രാഷ്ട്രീയം തന്നെയാണുണ്ടായിരുന്നത്. സവര്‍ണ മേല്‍ജാതിക്കാരുടെ രാഷ്ട്രീയ ആധിപത്യത്തെ മതേതര പുരോഗമന രാഷ്ട്രീയമായി നാം നിര്‍വചിച്ചു. പിന്നാക്ക വിഭാഗങ്ങള്‍, ആ രാഷ്ട്രീയത്തിലേക്ക് സജീവമായി പങ്കാളികളാവുകയും അധികാരത്തിലേക്ക് കടന്നുവരുകയും ചെയ്യുമ്പോള്‍ ജാതി മേലാളന്മാര്‍ പുരോഗമനം ചമഞ്ഞ് പിന്നാക്ക ഉണര്‍വുകളെ ജാതിരാഷ്ട്രീയം എന്നു പറഞ്ഞ് ആക്ഷേപിക്കുകയായിരുന്നു. അതുകൊണ്ടാണ് എസ്.പിയും ബി.എസ്.പിയും ജാതി രാഷ്ട്രീയ പാര്‍ട്ടികളായി മുദ്രകുത്തപ്പെടുന്നത്. ജാതിയും ജാത്യാധിപത്യവും ഇന്ത്യയിലെ വലിയൊരു യാഥാര്‍ഥ്യമാണെന്ന് കഴിഞ്ഞ പാര്‍ട്ടി കോണ്‍ഗ്രസില്‍ സി.പി.എം തിരിച്ചറിഞ്ഞു (അത് തിരിച്ചറിയാന്‍ ഇത്രയും കാലമെടുത്തത് ആ പാര്‍ട്ടിയുടെ ജനിതക ദൗര്‍ബല്യം). എന്നിട്ടും പുതിയ പോളിറ്റ് ബ്യൂറോയിലും ശ്രേഷ്ഠ ബ്രാഹ്മണരെ കുത്തിനിറച്ചു തന്നെയാണ് സി.പി.എം മുന്നോട്ട് പോവുന്നത്. പക്ഷേ, ഈ ബ്രാഹ്മണാധിപത്യം മഹത്തായ മാനവിക ജനാധിപത്യമാണെന്ന് എല്ലാവരും മനസ്സിലാക്കിക്കൊള്ളണം! 1987ലേതുപോലെ ഹിന്ദു ഏകീകരണം നടത്തി രാഷ്ട്രീയ ലാഭം നേടാമെന്നാണ് ഇപ്പോള്‍ സി.പി.എം ആലോചിക്കുന്നത്. സി.പി.എമ്മിന് എളുപ്പത്തില്‍ എടുത്തുകളിക്കാവുന്ന കാര്‍ഡാണത്. അഞ്ചാം മന്ത്രി വിവാദത്തില്‍ പലപ്പോഴും എന്‍.എസ്.എസിനേക്കാള്‍ രൂക്ഷമായി സി.പി.എം നേതാക്കള്‍ പ്രതികരിക്കാന്‍ കാരണമതാണ്. പക്ഷേ, 1987ലേതില്‍ നിന്ന് വ്യത്യസ്തമായി ജനസംഖ്യാ ഘടനയില്‍ വലിയ മാറ്റങ്ങളുണ്ടായിട്ടുണ്ടെന്ന് സി.പി.എം മനസ്സിലാക്കണം. മുസ്ലിം, ക്രിസ്ത്യന്‍ സമൂഹങ്ങളെ അപ്പാടെ ശത്രുപക്ഷത്ത് നിര്‍ത്തി പഴയ ഇ.എം.എസ് കളികള്‍ ആവര്‍ത്തിക്കാമെന്നാണ് അവര്‍ വിചാരിക്കുന്നതെങ്കില്‍ ഇടതുമുന്നണിയുടെ ചാവടിയന്തിരം അടുത്തുതന്നെ നടത്തേണ്ടി വരും.
      അഞ്ചാം മന്ത്രിസ്ഥാനം മുസ്ലിംലീഗിന് ഏതു നിലയിലും അര്‍ഹതപ്പെട്ടതാണെന്ന് ഏവരും സമ്മതിക്കും-കോണ്‍ഗ്രസും അത് സമ്മതിക്കുന്നുണ്ട്. പക്ഷേ, ഇപ്പോള്‍ അപമാനിച്ച് വശം കെടുത്തിയ ശേഷം, ലീഗിന്റെ പ്രതിച്ഛായയെ കളങ്കപ്പെടുത്തിയാണ് അഞ്ചാം മന്ത്രി സ്ഥാനം, പുതിയ വകുപ്പുകളൊന്നുമില്ലാതെ തന്നെ അനുവദിക്കപ്പെട്ടിരിക്കുന്നത്. മുസ്ലിം ലീഗിന് ഇതില്‍ ഒരുപാട് പാഠങ്ങള്‍ പഠിക്കാനുണ്ട്. രാഷ്ട്രീയമായി അപമാനിച്ചുകൊണ്ടാണ് കേരളത്തിലെ അധികാര രാഷ്ട്രീയത്തിലേക്ക് കോണ്‍ഗ്രസ് മുസ്ലിംലീഗിന് പ്രവേശം നല്‍കിയത്. 1960ലെ മന്ത്രിസഭയില്‍ പ്രാതിനിധ്യം നല്‍കാതെ സീതി സാഹിബിനെ സ്പീക്കര്‍ മാത്രമാക്കി. അദ്ദേഹം മരിച്ചപ്പോള്‍ ലീഗില്‍നിന്ന് രാജിവെപ്പിച്ച ശേഷം മാത്രമേ സി.എച്ച്. മുഹമ്മദ്കോയക്ക് സ്പീക്കര്‍ പദവി നല്‍കിയുള്ളൂ. ലീഗിനെ അപമാനിക്കുക എന്ന കോണ്‍ഗ്രസിന്റെ ഈ രാഷ്ട്രീയ പൈതൃകത്തിന് മാറ്റം വന്നത് ലീഗ് വിനീത വിധേയനായി കീഴടങ്ങിക്കൊടുത്തതിന് ശേഷം മാത്രമാണ്. രാഷ്ട്രീയ മിതത്വം, പക്വത, അവധാനത എന്നിവ ലീഗിന്റെ മഹത്വമായി കോണ്‍ഗ്രസടക്കമുള്ള രാഷ്ട്രീയ പാര്‍ട്ടികളും സവര്‍ണ മാധ്യമങ്ങളും ചാര്‍ത്തിക്കൊടുക്കാറുണ്ട്. ഒരര്‍ഥത്തില്‍ ഇത് ശരിയുമാണ്. അനാവശ്യമായ വിലപേശലുകള്‍ക്കും വാശികള്‍ക്കും ലീഗ് പലപ്പോഴും നില്‍ക്കാറില്ല. മുന്നണിയുടെ പൊതുവായ ആവശ്യങ്ങള്‍ക്ക് വേണ്ടി അപ്രതീക്ഷിതമായ വിട്ടുവീഴ്ചകള്‍ അവര്‍ നടത്തിയിട്ടുണ്ട്. ഉത്തരവാദിത്തമുള്ള ഘടകകക്ഷി എന്നതായിരുന്നു എപ്പോഴും ലീഗിന്റെ നിലപാട്. എം.വി. രാഘവനും എ.കെ. ആന്റണിക്കും യഥാക്രമം അഴീക്കോടും തിരൂരങ്ങാടിയും കൈവെള്ളയില്‍ വെച്ചുകൊടുത്തതും ഈ രാഷ്ട്രീയ പാരമ്പര്യത്തിന്റെ ഭാഗമായായിരുന്നു. എന്നാല്‍, ഈ വിശാലത ചിലപ്പോള്‍ പോയിപ്പോയി സമ്പൂര്‍ണമായ കീഴടങ്ങലായും അടിമത്തമായും വരെ പരിണമിക്കാറുമുണ്ട്. എന്നല്ല, പൊതുസമൂഹത്തിന്റെ മുന്നില്‍ നല്ലപിള്ള ചമയാന്‍ വേണ്ടി തങ്ങള്‍ പ്രതിനിധാനം ചെയ്യുന്ന സമുദായത്തെ ഒറ്റിക്കൊടുക്കാനും പിന്നില്‍ നിന്ന് കുത്താനും വരെ ലീഗ് സന്നദ്ധമായിട്ടുമുണ്ട്. ബാബരി മസ്ജിദ്, സിറാജുന്നിസ, മഅ്ദനി, തീവ്രവാദവേട്ടയുടെ പേരിലെ പീഡനങ്ങള്‍, ഏറ്റവും ഒടുവില്‍ ഇ-മെയില്‍ വിവാദത്തില്‍ വരെ ലീഗ് ഈ നിലപാടാണ് സ്വീകരിച്ചത്. എന്നല്ല, ഇത്തരം നിലപാടുകള്‍ (നിലപാടില്ലായ്മകള്‍) സ്വീകരിക്കുന്നതുകൊണ്ടാണ് സവര്‍ണ രാഷ്ട്രീയ മേലാളന്മാര്‍ക്ക് ലീഗ് സ്വീകാര്യവും പ്രിയപ്പെട്ടതുമാവുന്നത്. ലീഗിന് പുറത്തുള്ള, ഈ യാഥാര്‍ഥ്യങ്ങള്‍ വിളിച്ചു പറയുന്നവരെ തീവ്രവാദികളാക്കുന്നതും ഈ രാഷ്ട്രീയ കൗശലത്തിന്റെ ഭാഗമാണ്.(Continues....)

      Delete
    3. (Continues..>)പുതിയ സാഹചര്യത്തില്‍ എല്ലാവരും ചേര്‍ന്ന് ലീഗിനെ വര്‍ഗീയവത്കരിക്കുന്നത് അഞ്ചാം മന്ത്രി വിഷയത്തില്‍, അണികളുടെ സമ്മര്‍ദത്തിന് വഴങ്ങിയാണെങ്കിലും, ലീഗ് ശക്തമായ നിലപാടെടുത്തു എന്നതുകൊണ്ടാണ്. അതായത്, എപ്പോഴും കീഴടങ്ങുന്ന, ദുര്‍ബലമായ ലീഗിനെയാണ് സവര്‍ണ രാഷ്ട്രീയത്തിനാവശ്യം. അത് ലംഘിക്കുന്നവരെയെല്ലാം അവര്‍ പൈശാചികവത്കരിച്ച് വശംകെടുത്തും. അത് തിരിച്ചറിയാനെങ്കിലും പുതിയ വിവാദങ്ങള്‍ ലീഗിനെ സഹായിച്ചെങ്കില്‍ അത്രയും നന്ന്. പക്ഷേ, പുതിയ വിവാദത്തെ വിജയകരമായി കൈകാര്യം ചെയ്യുന്നതില്‍ ലീഗിന് ഏറെ പിഴച്ചു. തങ്ങളുയര്‍ത്തുന്ന രാഷ്ട്രീയ ദര്‍ശനത്തെ തന്നെ ചോദ്യം ചെയ്യുന്നതായിരുന്നു യഥാര്‍ഥത്തില്‍ അഞ്ചാം മന്ത്രി വിവാദത്തിന്റെ ആശയപരമായ കാതല്‍. അത് തിരിച്ചറിഞ്ഞ്, പിന്നാക്കരാഷ്ട്രീയത്തിന്റെ കൊടിക്കൂറ ഉയരത്തില്‍ ഉയര്‍ത്തിപ്പിടിക്കാനോ അതിനനുസരിച്ച് കാമ്പയിന്‍ നടത്താനോ ലീഗിന് സാധിച്ചില്ല. എന്നുമാത്രമല്ല, കോണ്‍ഗ്രസ് നേതാക്കളുടെ വീടുകളിലേക്ക് തെറിമുദ്രാവാക്യങ്ങളുമായി അണികളെ പറഞ്ഞയക്കുകയായിരുന്നു അവര്‍. കാര്യങ്ങള്‍ വഷളാക്കുന്നതില്‍ ഇത് വലിയ പങ്ക് വഹിച്ചിട്ടുണ്ട്. ഇ.ടി. മുഹമ്മദ് ബഷീര്‍ ഇടക്കിടെ നടത്തുന്ന ടെലിവിഷന്‍ കമന്റുകള്‍ മാത്രമാണ് ദിശയും വ്യക്തതയുമുള്ള രാഷ്ട്രീയത്തെ മുന്നോട്ടുവെച്ചത്. തങ്ങള്‍ കാലൂന്നി നില്‍ക്കുന്ന അധസ്ഥിത രാഷ്ട്രീയത്തിന്റെ സാധ്യതകളെ കൂടുതല്‍ വിശാലമാക്കേണ്ടതുണ്ട് എന്ന സന്ദേശമാണ് ഈ വിവാദം ലീഗിന് നല്‍കുന്നത്. അല്‍പം കൂടി ഇച്ഛാശക്തിയോടെ, പിന്നാക്ക, അധസ്ഥിത, ന്യൂനപക്ഷ രാഷ്ട്രീയത്തെ മുന്നോട്ട് കൊണ്ടുപോകാന്‍ ലീഗ് സന്നദ്ധമായാല്‍, അതിനനുസരിച്ചുള്ള രാഷ്ട്രീയ കൂട്ടായ്മകള്‍ സൃഷ്ടിക്കാനുള്ള ഭാവന കൈവശപ്പെടുത്തിയാല്‍, അത് വലിയ രാഷ്ട്രീയ മാറ്റങ്ങള്‍ കേരളത്തില്‍ കൊണ്ടുവരും.

      (സീ ദാവൂദ് 'മാധ്യമത്തില്‍ 'എഴുതിയ ലേഖനം)

      Delete
  8. ഇതേ വിഷയത്തില്‍ ഡോ‍. ഡി ബാബുപോള്‍ 'മാധ്യമത്തില്‍ 'എഴുതിയ ലേഖനം താഴെ...

    അലിക്കു ശേഷം പ്രളയം..!
    ==================
    ഡി ബാബുപോള്‍

    'നാണംകെട്ടും മന്ത്രിപ്പണി നേടിക്കൊണ്ടാല്‍, നാണക്കേടാപ്പണി തീര്‍ത്തുകൊള്ളും' എന്ന് ദോഷൈകദൃക്കുകള്‍ക്ക് പറയാം. മൂന്ന് ഭാര്യമാരെ പോറ്റുന്ന അരോഗദൃഢഗാത്രന്‍ നാലാമതൊരാളെ നിയമാനുസാരം വേള്‍ക്കുമ്പോള്‍ വധുവിനും സപത്നിമാര്‍ക്കും വിരോധമില്ലെങ്കില്‍ നാട്ടിലെ വായാടികള്‍ എന്തിന് കമന്റടിക്കണം എന്ന് നിഷ്പക്ഷമതികള്‍ക്ക് ചോദിക്കാം. മമ്മൂട്ടി രാഷ്ട്രീയത്തില്‍ ഇല്ലാത്ത സ്ഥിതിക്ക് ഒരു സുന്ദരകളേബരന്‍ മന്ത്രിയാവുന്നതില്‍ ചേലൊന്ന് വേറെയല്ലേ എന്ന് സിനിക്കുകള്‍ക്ക് പരിഹസിക്കാം. ഏതായാലും സംഗതി നടന്നു. മഞ്ഞളാംകുഴി അലി മന്ത്രിയായി.

    മുസ്ലിംലീഗിന് അഞ്ച് മന്ത്രിമാര്‍ ഉണ്ടാകുന്നതില്‍ അഭംഗിയല്ലാതെ അനൗചിത്യമില്ലെന്ന് വിശ്വസിക്കുന്നവരുടെ കൂട്ടത്തിലാണ് ഞാന്‍. അത് സാധിച്ച വിധമാണ് അഭംഗി ചാര്‍ത്തുന്നത്. ലീഗിനകത്തെ വിഭാഗീയതയും വ്യക്തിവൈരാഗ്യങ്ങളും മറ്റും ഇതില്‍ എത്ര പങ്ക് വഹിച്ചുവെന്ന ചോദ്യത്തിന് ഉത്തരംപറയാന്‍ അറിയുന്നില്ല. എങ്കിലും പാണക്കാട് തങ്ങളെ കോട്ടയത്തിന് കൊണ്ടുപോയത് ഉചിതമായില്ലെന്ന് പറയാതെ വയ്യ. ഇപ്പോഴത്തെ തങ്ങള്‍ കൈകാര്യം ചെയ്ത ആദ്യത്തെ പ്രധാനപ്രശ്നമായിരുന്നു അഞ്ചാംമന്ത്രിയുടെ സത്യപ്രതിജ്ഞ. അദ്ദേഹത്തിന്റെ പ്രായോഗികപരിചയത്തിന്റെ അപര്യാപ്തത ആരോ മുതലെടുത്തു. കളി തുടങ്ങിയപ്പോള്‍തന്നെ തുറുപ്പുഗുലാനെ ഇറക്കിയാല്‍ കളി തോല്‍ക്കാന്‍ പാടില്ല എന്നത് ന്യായം. രാഷ്ട്രീയത്തില്‍ ഇങ്ങനെ ഇടംവലം തിരിയാനാവാത്ത സാഹചര്യങ്ങള്‍ സൃഷ്ടിക്കപ്പെടരുതെന്ന അതിനേക്കാള്‍ വലിയ ന്യായം വിസ്മരിക്കപ്പെട്ടത് അന്യായം. അതുകൊണ്ടാണ് തങ്ങളുടെ അനുവാദം വാങ്ങി അലി പിന്മാറി നല്ല മാതൃക കാട്ടണം എന്ന് കഴിഞ്ഞയാഴ്ച പറഞ്ഞത്. മന്ത്രിയായ അലിയേക്കാള്‍ എത്രയോ വലിയ മഹാനാകുമായിരുന്നു 'ഈ സാഹചര്യങ്ങളില്‍ സമൂഹത്തിന്റെ വിശാലതാല്‍പര്യങ്ങളെക്കരുതി ഞാന്‍ പിന്മാറുന്നു' എന്ന് പറയുന്ന അലി.
    ലീഗിന്റെ ആവശ്യത്തില്‍ നീതികേടൊന്നും ഇല്ല. എന്നാല്‍, അത് കൊടുക്കാനാണെങ്കില്‍ ആദ്യം തന്നെ കൊടുത്താല്‍ മതിയായിരുന്നു എന്ന് മാത്രം. ഡെപ്യൂട്ടി സ്പീക്കറും ചീഫ് വിപ്പും ലീഗ് വിട്ടുകൊടുത്തത് ഒഴികഴിവിന് പഴുതില്ലാത്ത പത്മവ്യൂഹം ചമക്കാനായിരുന്നു എന്ന് മുഖ്യമന്ത്രിയും രമേശും തിരിച്ചറിഞ്ഞില്ല. ഒടുവില്‍ ലീഗ് മന്ത്രിമാര്‍ രാജിവെക്കുമെന്ന് പറഞ്ഞപ്പോഴെങ്കിലും കളിക്ക് ബദല്‍ കളിക്കാന്‍ ബോബനും മോളിക്കും കഴിഞ്ഞതുമില്ല; 'വേണ്ട, ഞാന്‍ രാജി വെക്കാം' എന്നുപറയാന്‍ ഉമ്മന്‍ചാണ്ടി ധൈര്യം കാണിക്കണമായിരുന്നു. പകരം ഗതികെട്ടതിനാല്‍ ഇതിനാല്‍ പുല്ല് തിന്നുകൊള്ളുന്നുവെന്ന് പറഞ്ഞ മുഖ്യമന്ത്രി അഭ്യുദയകാംക്ഷികളെ നിരാശപ്പെടുത്തി.(Continues...)

    ReplyDelete
    Replies
    1. (Continues..>) ലീഗിന് അഞ്ചാം മന്ത്രി വരുന്നതോടെ ഏത് ആകാശമാണ് ഇടിഞ്ഞുവീഴാന്‍ ഉണ്ടായിരുന്നത്? പഴയ ചരിത്രം നോക്കാം. 1957ലെ മന്ത്രിസഭ. ആകെ അംഗസംഖ്യ പതിനൊന്ന്. തൃശൂരില്‍നിന്ന് നാലുപേര്‍. ആലപ്പുഴയില്‍നിന്ന് മൂന്നുപേര്‍. ശിഷ്ടകേരളത്തില്‍നിന്ന് നാലുപേര്‍. എവിടെയായിരുന്നു പ്രാദേശിക സന്തുലനം? ക്രിസ്ത്യന്‍ പേരുള്ളവര്‍ മൂന്ന് (ടി.വി, കെ.സി. ജോര്‍ജ്, മുണ്ടശ്ശേരി), സവര്‍ണര്‍ നാല്, മുസ്ലിം ഒന്ന് (ടി.എ. മജീദ്), പിന്നാക്കസമുദായം രണ്ട്, പട്ടികജാതി ഒന്ന്. എവിടെയായിരുന്നു സാമുദായിക സന്തുലനം? വിമോചനസമരം കഴിഞ്ഞ് അധികാരമേറ്റ അടുത്ത മന്ത്രിസഭയിലും ഒരു സന്തുലനവും കാണാനില്ല. പട്ടംതാണുപിള്ള എന്ന നായരും കുഞ്ഞ് എന്ന മുസ്ലിമും ചന്ദ്രശേഖരന്‍ എന്ന അമ്പലവാസിയും മന്ത്രിമാരായത് ജാതിക്കണക്കിലല്ല. ആര്‍. ശങ്കറും പി.ടി. ചാക്കോയും പി.പി. ഉമ്മര്‍കോയയും വി.കെ. വേലപ്പനും മന്ത്രിമാരായതും ജാതിക്കണക്കിലല്ല. വി.എസ് നയിച്ച ഇ.ജ.മു. മന്ത്രിസഭയില്‍ പോലും സന്തുലനവും പ്രാതിനിധ്യവും കണക്കനുസരിച്ചായിരുന്നില്ലല്ലോ.
      ഇപ്പോഴത്തെ മന്ത്രിസഭയില്‍ തന്നെ കെ.സി. ജോസഫും ആര്യാടന്‍ മുഹമ്മദും ജാതിക്കണക്കില്‍ വന്നവരാണോ? മാണിയും ജോസഫും ബാലകൃഷ്ണപിള്ളയും ഒന്നിച്ചായിരിക്കുകയും ആ കക്ഷിക്ക് രണ്ട് മന്ത്രിമാര്‍ മാത്രം ഉണ്ടായിരിക്കുകയും ആയിരുന്നെങ്കില്‍ മാണിയും പിള്ളയും ആകുമായിരുന്നില്ലേ മന്ത്രിമാര്‍? ആര്‍.എസ്.പിക്കാരനായ ഷിബുവിനെയും ജനതാദള്‍ മന്ത്രി മോഹനനെയും ജേക്കബ് ഗ്രൂപ്പിലെ അനൂപിനെയും ജാതി നോക്കിയാണോ എടുത്തത്? ശ്രേയാംസ്കുമാര്‍ മന്ത്രിയായാല്‍ ജൈനമതത്തിനുള്ള പ്രാതിനിധ്യമാവുമോ?

      ആന്റണി മുഖ്യമന്ത്രിയും ബാബുജേക്കബ് ചീഫ് സെക്രട്ടറിയും തരകന്‍ ഡി.ജി.പിയും ഉമ്മന്‍ചാണ്ടി യു.ഡി.എഫ് കണ്‍വീനറും ആയിരുന്നപ്പോള്‍ ഒരു മുതിര്‍ന്ന പത്രപ്രവര്‍ത്തകന്‍ എന്നോട് പറഞ്ഞു എല്ലാവരും ക്രിസ്ത്യാനികളായത് അസംതൃപ്തിക്ക് ഇടയാക്കുന്നുവെന്ന്. കരുണാകരന്‍ മുഖ്യമന്ത്രിയും പത്മകുമാര്‍ ചീഫ് സെക്രട്ടറിയും മധുസൂദനന്‍ ഡി.ജി.പിയും ശങ്കരനാരായണന്‍ കണ്‍വീനറും ആയിരുന്നപ്പോള്‍ ഉണ്ടായിരുന്ന അസംതൃപ്തിയേക്കാള്‍ കൂടുതലോ കുറവോ എന്ന് ചോദിച്ചപ്പോള്‍ 'നല്ല മഴക്കോളുണ്ട്. ഇക്കൊല്ലം ഇടവപ്പാതി നേരത്തേയാവും' എന്നായിരുന്നു മറുപടി. ചര്‍ച്ച പിന്നെ കാലാവസ്ഥയെക്കുറിച്ചായി.

      യു.ഡി.എഫ് അധികാരത്തില്‍ വന്നത് ലീഗും ഒപ്പമുണ്ടായിട്ടാണ്. മുന്നണിക്ക് പുറത്തുള്ള ലീഗ് ദുര്‍ബലമാവുമെന്നത് ശരിതന്നെ; മ്മിണി ബല്യ ഒരു 'ബി.ജെ.പി'. മുന്നണിക്ക് പുറത്ത് കേരള കോണ്‍ഗ്രസിന് ഒന്നോ രണ്ടോ സീറ്റ് കിട്ടിയേക്കാം. ലീഗിനേക്കാള്‍ ചെറിയ മറ്റൊരു 'ബി.ജെ.പി'. അങ്ങനെ നോക്കിയാല്‍ ഭാ.ജ.പാ. ഏതെങ്കിലും മുന്നണിയില്‍ കടന്നുകൂടിയാല്‍ അവരാവില്ലേ ആ മുന്നണിയിലെ രണ്ടാംകക്ഷി ഒന്നുരണ്ട് തെരഞ്ഞെടുപ്പ് കഴിയുമ്പോള്‍? മാത്രമോ പി.ജെ. ജോസഫ് ഇ.ജ.മുവില്‍ തുടര്‍ന്നിരുന്നെങ്കില്‍ ഇത്തവണ യു.ഡി.എഫിന് അധികാരം കിട്ടുമായിരുന്നില്ലെന്നത് മറക്കാമോ?(Continues...)

      Delete
    2. (Continues...>)ചുരുക്കിപ്പറഞ്ഞാല്‍ വിജയത്തില്‍ പ്രദര്‍ശിപ്പിക്കേണ്ട വിനയവും സംയമനവും ലീഗ് പാലിക്കാതിരുന്നതാണ് പ്രശ്നം. കുഞ്ഞാലിക്കുട്ടിയുടെ വകുപ്പിന്റെ ഒരു മൂല ചെത്തി വലിയ ഒരു അലിക്കുട്ടിക്ക് കൊടുത്താല്‍ സമുദായത്തിന് എന്ത് ഗുണം, മലബാറിനും മലപ്പുറത്തിനും എന്ത് ഗുണം, ലീഗിന് മൊത്തത്തില്‍ എന്ത് ഗുണം? കുറേ ശത്രുക്കളെ പുതുതായി സൃഷ്ടിച്ചുവെന്ന് മാത്രം.

      മുഖ്യമന്ത്രി വകുപ്പൊഴിഞ്ഞ ഗൗതമരാജകുമാരനാവുന്നതൊക്കെ കൊള്ളാം. കരുണാകരന്‍ രവിയുടെ വകുപ്പ് പിടിച്ചെടുത്തത് പോലെയല്ല ഈ ത്യാഗമെന്ന് സമ്മതിക്കുന്നു. എങ്കിലും മൊത്തത്തില്‍ മുഖ്യമന്ത്രിയുടെ നിസ്സഹായത തെളിയിക്കുന്നതായി സംഭവപരമ്പര. ഇനിയിപ്പോള്‍ ബാലകൃഷ്ണപിള്ള ഗണേശനെ കൂറുമാറ്റത്തില്‍ കുടുക്കാന്‍ കാത്തിരിക്കുകയായിരിക്കും മുഖ്യമന്ത്രി. അതൊന്ന് പറഞ്ഞുതീര്‍ക്കരുതോ വേഗം? പാര്‍ട്ടി ഏതായാലും കീഴൂട്ട് വിലാസമാണ്. പിന്നെ കാരണവര്‍ പറയുന്നത് ഉചിതമായ നേരത്ത് അനുസരിക്കുന്നതല്ലേ ബുദ്ധി? പാര്‍ട്ടി മന്ത്രിയെ പിന്‍വലിച്ചാല്‍ പാര്‍ട്ടിക്ക് പുറത്തുള്ളവര്‍ അതില്‍ ഇടപെടുന്നത് സൂക്ഷിച്ചുവേണം. ലീഗിന് തങ്ങളെന്നത് പോലെയാണ് ആ പാര്‍ട്ടിക്ക് ബാലകൃഷ്ണപിള്ള. ഗണേശന്‍ പോകുന്ന പക്ഷം പകരം ആ ശിവദാസന്‍നായരെ മന്ത്രിയാക്കണം. പത്തനാപുരത്തിന് പകരം പത്തനംതിട്ട. അല്ല, ശിവദാസന്‍നായര്‍ അനഭിമതനാണെങ്കില്‍ മറ്റൊരു നായരെ വെക്കണം. ഇനി ആ വിഷയവും കുളമാക്കിയിട്ടേ കര കയറൂ എന്നുണ്ടോ?
      ഒരു അവസാന വാക്ക് കൂടി. സി.എന്‍. ബാലകൃഷ്ണനെ മന്ത്രിയാക്കിയത് കിളിപ്പാട്ടുകാരനായതുകൊണ്ടല്ല. ഇതുവരെ ഒരു വിശ്വകര്‍മജനോ ഗൗഡസാരസ്വതബ്രാഹ്മണനോ മന്ത്രിയായോ? ശേഷനും സുന്ദരത്തിനും ശേഷം തമിഴ്ബ്രാഹ്മണമന്ത്രിമാരും ഇല്ല. അങ്ങനെയൊക്കെ നോക്കിയാല്‍ ഇവിടെ നാല് പ്രബലസമുദായങ്ങളാണ് എന്നും ഭരിച്ചിട്ടുള്ളത് എന്ന് കാണാം. നായര്‍, ഈഴവന്‍, മുസ്ലിം, സുറിയാനി ക്രിസ്ത്യാനി. ക്രിസ്ത്യാനികളില്‍ എണ്ണത്തില്‍ കൂടിയ ലത്തീന്‍കാരനെ അടുപ്പിക്കുന്നില്ല താനും. ഈ നാല് കൂട്ടരുടെ ഞാനോ നീയോ എന്ന തര്‍ക്കം ആണ് അലി വിഷയത്തിലും തെളിഞ്ഞത്. അത് ഇത്ര വഷളാക്കിയത് അലിയുടെ അഭ്യുദയകാംക്ഷികളാണുതാനും.

      ന കശ്ചിദപി ജാനാതി
      കിം കസ്യ ശ്വോ ഭവിഷ്യതി
      അതഃ ശ്വഃ കരണീയാനി
      കുര്യാദ ദൈyവ ബുദ്ധിമാന്‍
      എന്ന് പ്രമാണം.
      നാളെ ചെയ്യേണ്ടവ ഇന്ന് തന്നെ ചെയ്യുന്നവനെയാണ് ബുദ്ധിമാന്‍ എന്ന് വിളിക്കുന്നത്. ഉമ്മന്‍ചാണ്ടിയും രമേശും കുളംകലക്കി പരുന്തിന് കൊടുക്കാതിരുന്നാല്‍ നാടിന് കൊള്ളാം. നല്ല ഒരു സര്‍ക്കാറാണ്, അത് കളഞ്ഞുകുളിക്കരുത്.
      ------------------------------------------------
      (ഡോ‍. ഡി ബാബുപോള്‍ 'മാധ്യമത്തില്‍ 'എഴുതിയ ലേഖനം)

      Delete

LinkWithin

Related Posts Plugin for WordPress, Blogger...