ഒറ്റമൈനയുടെ ഒപ്പം കൂടിയവര്‍

Thursday, 3 May 2012

ഏ ആറും ദാവൂദും, പിന്നെ ചൊറിച്ചിലിന്റെ മാധ്യമ രാഷ്ട്രീയവും

  
ഏതൊരു സംഘടിത മുന്നേറ്റങ്ങളുടെ പിറവിക്കു പിന്നിലും ചരിത്രപരമായ ഒരു ഹേതുവുണ്ടാകും. ഒരു സുപ്രഭാതത്തില്‍ കാര്യകാരണങ്ങളോ ചരിത്രദൌത്യങ്ങളോ ഇല്ലാതെ ഒരു സംഘടിത ജനത്തെ കാണുന്നെങ്കില്‍ അതിനെ പ്രസ്ഥാനം എന്നല്ല, ആള്‍ക്കൂട്ടം എന്നാണു വിളിക്കുക. അതൊരു സ്ഥായിയായ സംഗതിയുമല്ല. താല്‍കാലിക നേട്ടങ്ങളുണ്ടാക്കി ആ ആള്‍ക്കൂട്ടം പിരിഞ്ഞു പോകും. പിന്നീട് അവരെ ഒന്നിച്ചു വീണ്ടും കൊണ്ടുവരുന്നതിനുള്ള ഒരു പൊതുതന്തു ഒന്നും തന്നെ കാണില്ല. പിന്നെയും ഒത്തു കൂടുന്നത് മറ്റൊരു ആള്‍കൂട്ടം. പണ്ട് പഞ്ചായത്ത് തെരഞ്ഞെടുപ്പില്‍  മാര്‍ക്സിസ്റ്റ്‌ പാര്‍ട്ടി അടിവേര് 
നഷ്ട്ടപെട്ട ഒരു ഘട്ടത്തില്‍ ശ്രീ. ടി കെ ഹംസ ലീഗിനെയും ജമാഅത്തെ ഇസ്ലാമിയെയും ഏച്ചു കെട്ടാന്‍ വേണ്ടി ഒരു ഞാണിന്‍മേല്‍ കളി നടത്തിയിരുന്നു. കേരളത്തില്‍ ലീഗുണ്ടായത് ഒരു ആള്‍ക്കൂട്ട വിപണിയുടെ സാധ്യത കണ്ടല്ല. ജമാഅത്തുണ്ടായതും അങ്ങനെയല്ല എന്ന് തന്നെയാണ് എന്‍റെ വിശ്വാസം.  ശ്രീ. ഹംസ പറഞ്ഞിരുന്നത്  പോലെ മതന്യൂനപക്ഷത്തിന്റെ അവകാശങ്ങള്‍ക്കും ഭൗതിക ആവശ്യങ്ങള്‍ക്കും വേണ്ടി തന്നെയാണ് ലീഗുണ്ടായത്. ആ സംഘടിത ശക്തി ചേരലിന് ഒരു ചരിത്രപരമായ പശ്ചാത്തലമുണ്ട്. ശ്രീ. ഹംസയുടെ പൂര്‍വികരുള്‍പ്പെടെയുള്ള മാപ്പിളമാര്‍ പിറന്ന നാടിനോടുള്ള വിശ്വാസപരമായ കടപ്പാട് വീട്ടാന്‍ പോരാട്ടങ്ങളുടെ വഴി തിരഞ്ഞെടുത്ത ഒരു കാലം. പോരാടാന്‍ പോയവര്‍ക്ക് വിദ്യ നേടാനും ജോലി നേടാനുമൊന്നും യോഗമുണ്ടായില്ല. സാമ്രാജ്യത്വത്തോടുള്ള അവന്‍റെ എതിര്‍പ്പ് അവരുടെ ഭാഷയോട് വരെ അവന്‍ കാണിച്ചു കളഞ്ഞു. വെള്ളക്കാരന്റെ ഓരം പറ്റി ദിവാനാകാനും പട്ടം വാങ്ങാനും അവനെ കിട്ടിയില്ല. ഫലത്തില്‍ ഒരു തലമുറ വിദ്യാഭ്യാസപരമായി പിന്നോട്ടടിച്ചു. സാമൂഹികമായ അസമത്വത്തിലേക്ക് അത് വഴി വച്ചു. അങ്ങിനെ നാനോന്മുഖങ്ങളായ ഒരു പാട് ചെറുതും വലുതുമായ പോരാട്ടങ്ങളിലൂടെ സ്വാതന്ത്ര്യം ലഭിച്ചു. ഭാവിയോര്‍ക്കാതെ പോരാടി നിന്നവന് പിടിച്ചു നില്‍ക്കാന്‍ കയ്യില്‍ ഒരു കോപ്പ് പോലുമില്ലാത്ത അവസ്ഥ. കൂനിന്‍മേല്‍ കുരു എന്ന പോലെ യാഥാസ്ഥികതയുടെ അന്ധത പേറിയ ഒരു കൂട്ടം പുരോഹിതരുടെ ഇടപെടലുകളും അവരെ കൂരിരുട്ടിലേക്ക് തള്ളി വിട്ടു.  ഈയൊരു സന്നിഗ്ധ ഘട്ടത്തിലാണ് മതവിശ്വാസത്തെ ജീവനാഡി പോലെ കൊണ്ട് നടക്കുന്ന ഒരു സമൂഹത്തിനു മുന്നിലേക്ക്‌ വിശ്വാസത്തെ ഹനിക്കാതെയുള്ള രാഷ്ട്രീയ നിലനില്‍പ്പിനുള്ള ഒരു ഭൂമികയുമായി ലീഗ് കടന്നു വരുന്നത്.




നാല്പത്തി എട്ടില്‍ ഇന്ത്യന്‍ യൂണിയന്‍ മുസ്ലിം ലീഗ് മദ്രാസില്‍രൂപീകരിക്കുന്നതിന്റെ ആറ് വര്‍ഷം മുമ്പ് തന്നെ മലബാറില്‍ അതിന്‍റെ വിദ്യാര്‍ഥി സംഘടന രൂപം കൊണ്ടിട്ടുണ്ട്. വിദ്യാഭ്യാസമില്ലാതെ
പിന്നോക്കത്തിന്റെ തമസ്സ് ഒഴിഞ്ഞു പോകില്ലെന്നുള്ള ബോധ്യത്തിന്റെ ദര്‍ശനങ്ങളായിട്ടാണ് വിദ്യാര്‍ഥി ഫെഡറേഷനും കെ എം ഇ എ, എം ഇ എസ്, ഇ എം ഇ എ, തുടങ്ങി ഒരു പാട് വിദ്യാഭ്യാസ സംഘങ്ങളും ലീഗിന്റെ ജാഗ്രതയില്‍ പിറവി കൊള്ളുന്നത്‌. മലബാര്‍ സ്വാതന്ത്ര സമരത്തെ കര്‍ഷക സമരമായി വ്യാഖ്യാനിക്കുമ്പോഴും അതിനു പിന്നിലുണ്ടായിരുന്ന വിശ്വാസപരമായ ഒരു ഇന്ധനത്തിന്റെ കാര്യത്തില്‍ മൗനം പാലിക്കുന്നത് ഭൂഷണമല്ല. അങ്ങിനെയാണെങ്കില്‍ ലീഗിന്‍റെ പിറവിയില്‍ തന്നെ അതിനെ ആദ്യമായി ഏറ്റെടുത്ത മലബാറിലെ മാപ്പിളമാര്‍ കൂട്ടത്തോടെ കര്‍ഷക സമരത്തിന്‍റെ പേര് പറഞ്ഞു എന്ത്കൊണ്ട് ചെങ്കൊടി പിടിക്കാന്‍ പോയില്ല എന്ന് കൂടി പറയണമായിരുന്നു.
 

ലീഗില്‍ വര്‍ഗീയത കാണുന്ന ശ്രീ. ഹംസ അന്ന്  ഐ എന്‍ എല്ലിനെ എല്‍ ഡി എഫില്‍ നിന്നും അടര്‍ത്തിയതിനെക്കുറിച്ചു അബദ്ധത്തില്‍ രോഷാകുലനായി. ലീഗിന്‍റെ തീവ്രതയില്‍ മതിപ്പില്ലാതെ പിരിഞ്ഞു പോയവരുമായി സഹകരിച്ചിട്ടു ലീഗിന്‍റെ വര്‍ഗീയതയെക്കുറിച്ച് പ്രസംഗിക്കുന്നതിനെയാണ് നമ്മള്‍ 'കറിവേപ്പിലയുടെ' ചാരിത്ര്യ പ്രസംഗം എന്ന് പറയുക. മുസ്ലിങ്ങള്‍ക്കിടയില്‍ വര്‍ഗീയ വികാരം
നില നിര്‍ത്തി അധികാരം നില നിര്‍ത്തലാണ് ലീഗിന്‍റെ ഇദംപര്യന്തമുള്ള രീതിയെങ്കില്‍ ലീഗില്‍ നിന്നും പിരിഞ്ഞു പോയി എങ്ങനെയാണ് ഇത്രയധികം വര്‍ഗീയ തീവ്ര നിലപാടുള്ളവര്‍ ലീഗുണ്ടായത് മുതലേ പിറന്നും ഒടുങ്ങിയും തുടര്‍ന്ന് കൊണ്ടിരിക്കുന്നത്?    എം ഡി പി, സമസ്ത കേരള ലീഗ്, പ്രോഗ്രെസീവ് ലീഗ്, ഐ എന്‍ എല്‍, പി ഡി പി, എന്‍ ഡി എഫ്, എസ് ഡി പി ഐ ഇങ്ങിനെ പോകുന്നു ഇത്തരം പരീക്ഷണങ്ങളുടെ ചങ്ങല. ലീഗ് സെകുലര്‍ പക്ഷത്തു നിന്ന് സമുദായ ഉദ്ധരണം നടത്തുന്നു എന്നത് തന്നെയാണിത്തരം കൂണുകള്‍ മുളച്ചും ചീഞ്ഞും കൊണ്ടെയിരിക്കുന്നതിനു കാരണം.

ഇത്രയൊക്കെ ഇപ്പൊ പറയാന്‍ കാരണം അഞ്ചാം മന്ത്രി വിവാദം ലീഗിനെ വര്‍ഗീയമായി കൈകാര്യം ചെയ്യാന്‍ കേരളത്തിലെ മീഡിയകളും മുഖ്യധാരാ കക്ഷികളും ഉപയോഗപ്പെടുത്തി എന്ന നിരീക്ഷണത്തെ 
ഉദ്ധരിച്ചു ഓ. അബ്ദുറഹ്മാന്‍ സാഹിബ് മാധ്യമത്തില്‍ എഴുതിയ 'ഒടുവില്‍ അവര്‍ ലീഗിനെ തേടിയെത്തി' 
എന്ന ലേഖനം വായിച്ചപ്പോള്‍ വന്ന ചില സന്ദേഹങ്ങളാണ്.  രാഷ്ട്രീയ മണ്ഡലത്തില്‍ പ്രച്ഛന്ന വേഷത്തിലൂടെ കടന്നു കയറാനുള്ള കഴിഞ്ഞ പഞ്ചായത്ത് തെരഞ്ഞെടുപ്പു മുതലുള്ള ജമാഅത്തിന്റെ
നീക്കങ്ങളെ 'കോട്ടക്കല്‍ കഷായം' എന്ന് സീ. ദാവൂദ് പരിഹസിച്ച ലീഗിന്റെ കാര്മികത്വത്തില്‍ ഉണ്ടായ 
ഇതര മുസ്ലിം മതസംഘടനകളുടെ കൂട്ടായ്മ തല്ലിക്കെടുത്തിയതിന്റെ ഈര്‍ഷ്യ സീ ദാവൂദിനും  ഓ അബ്ദുറഹ്മാന്‍ സാഹിബിനും  ലീഗ് വിഷയത്തില്‍ എപ്പോ പേനയുന്തുമ്പോഴും തികട്ടി വരുന്നു എന്ന് കാണുന്നു.  

ജമാഅത്തെ ഇസ്ലാമിയുടെ ഒളിയജണ്ടകളെക്കുറിച്ച് താത്വികമായി സംവദിച്ചും ബഹുജനങ്ങള്‍ക്ക് മുമ്പില്‍ അവതരിപ്പിച്ചും തന്നെയാണ് ലീഗ് മുന്നോട്ടു പോയിരുന്നത്. എന്നാല്‍ പൊതുവായുള്ള വിഷയങ്ങളില്‍ സൌഹൃദവേദി പോലെയുള്ള കൂട്ടായ്മ രൂപീകരിച്ചു അഭിപ്രായ സമന്വയമുണ്ടാക്കാന്‍ ലീഗ് പണ്ട് മുതലേ ശ്രമിക്കുന്നു. അത്തരം യോഗങ്ങളില്‍ മുസ്ലിം വിഭാഗത്തിലെ എല്ലാ മത സാംസ്കാരിക വിദ്യാഭ്യാസ സംഘടനകളുടെ കൂട്ടത്തില്‍ ജമാഅത്തും സഹകരിക്കുന്നു എന്ന് മാത്രം. എന്നാല്‍ കുറച്ചു കാലമായി ഒരു പരിപൂര്‍ണ  രാഷ്ട്രീയ പാര്‍ട്ടിയായി രംഗ പ്രവേശം ചെയ്യാനുള്ള അണിയൊരുക്കങ്ങള്‍ ജമാഅത്ത് നടത്തി വരുന്നു എന്ന കാര്യം ശ്രീ സിദ്ദിഖ് ഹസ്സന്‍ ഉള്‍പ്പെടെയുള്ളവര്‍ സൂചന
നല്‍കിയതോടെ ലീഗ് കൂടുതല്‍ ജാഗ്രത  കാണിച്ചു.  കേരളത്തില്‍ നിന്നും അഖിലേന്ത്യാ നേതൃത്വത്തിലേക്ക് പോയ ശ്രീ സിദ്ധീഖ് ഹസ്സന്റെ സൂചനകളുടെ നിജസ്ഥിതി കേരളത്തിലെ ജമാഅത്ത് നേതൃത്വം ആദ്യം മൂടി വെക്കാന്‍ ശ്രമിക്കുകയും പിന്നീട് അവരുടെ രാഷ്ട്രീയ പ്രവേശം കഴിഞ്ഞ പഞ്ചായത്ത് തിരഞ്ഞെടുപ്പിലൂടെ ഉണ്ടാകുമെന്ന് ജമാഅത്ത് പരസ്യമാക്കുകയും ചെയ്തു. ആ ഒരു രാഷ്ട്രീയ തീരുമാനം
 അവരുടെ സ്വന്തം പൊളിറ്റിക്കല്‍  കാര്യ സെക്രട്ടറി ഹമീദ് വാണിമേലിനു  പോലും മനസ്സിലായില്ല 
എന്നത് വേറെ കാര്യം .

  
 വ്യക്തമായ മൌലികവാദ അജണ്ടകളുള്ള ഒരു സംഘടന കേരള മുസ്ലിം രാഷ്ട്രീയ ഭൂമികയില്‍ വന്നാലുണ്ടാകുന്ന ഭവിഷ്യത്ത് ലീഗിനേക്കാള്‍ നന്നായറിയാവുന്നവര്‍ ഉണ്ടാകില്ല . കാരണം ഇത്തരം ശ്രമങ്ങളെ കാലങ്ങളായി പ്രതിരോധിച്ചു വരുന്നത് ലീഗാണെന്നത് കൊണ്ട് തന്നെ.  ഇത്തരം കുടില പരീക്ഷണങ്ങള്‍ക്കൊക്കെ താല്‍കാലിക രാഷ്ട്രീയ ലാഭത്തിനു വേണ്ടി മേല്‍വിലാസമുണ്ടാക്കി കൊടുത്തവരാണ്  മാര്‍ക്സിസ്റ്റ്‌ പാര്‍ട്ടി. മതപഠനത്തിന്‍റെ ആത്മാവ് തൊടാത്ത പുരോഹിത വൃന്ദത്താല്‍ മേയ്ക്കപ്പെടുന്ന ഒരു സമൂഹത്തെ സെകുലര്‍ മനസ്സിനുടമകളായി നില നിര്‍ത്തുകയും ജനാധിപത്യത്തിലും മത നിരപേക്ഷതയിലും വിശ്വസിക്കുന്നവരായി മാറ്റുകയും ചെയ്ത ഒരു പ്രസ്ഥാനം ജമാഅത്തിനെപ്പോലെയൊരു കേഡര്‍ സംവിധാനത്തിന്റെ രാഷ്ട്രീയമുഖം അനാവരണം ചെയ്യാന്‍ ജാഗരൂകമായതിന്റെ ഫലമാണ് പഞ്ചായത്ത് തെരഞ്ഞെടുപ്പില്‍ ഈ പരീക്ഷണം വിലപ്പോകാതെ വന്നത്. "കോട്ടക്കല്‍ കഷായം' എന്ന് ജമാഅത്ത് പരിഹസിച്ച ലീഗിന്‍റെ രാഷ്ട്രീയ തന്ത്രം ശരിക്കുമേറ്റെന്നു തെരഞ്ഞെടുപ്പു ഫലത്തിന് ശേഷം ശ്രീ ഓ . അബ്ദുറഹ്മാന്‍ സമ്മതിച്ചതും നമ്മള്‍ കണ്ടു. ലീഗിന്‍റെ ഈയൊരു പ്രതിരോധമാണ് അവര്‍ നേരത്തെ തീരുമാനിച്ച നേരിട്ടുള്ള രാഷ്ട്രീയ പാര്‍ട്ടിയില്‍ നിന്നും ഉള്‍വലിഞ്ഞു ജനകീയ വികസന മുന്നണികളായി പ്രച്ഛന്ന വേഷമാടാന്‍ കാരണം.

ഇപ്പോള്‍ വെല്‍ഫെയര്‍ പാര്‍ട്ടി എന്ന പേരില്‍ പ്രത്യക്ഷമായി വരാന്‍ തീരുമാനിച്ചിട്ടുണ്ടെങ്കിലും അടിസ്ഥാനപരമായ നയങ്ങളില്‍ വ്യക്തത വരുത്താതെ ഏതു തന്നെ ജനപക്ഷ പ്രശ്നങ്ങളുടെ  മുന്‍നിരയില്‍ നിന്ന് പോരാടിയാലും പൊതുസമൂഹം സംശയത്തിന്റെ കണ്ണോടു കൂടിയേ ജമാഅതിനെ വീക്ഷിക്കുകയുള്ളൂ. പക്വമായ പ്രവര്‍ത്തന ശൈലിയും നിലവാരമുള്ള പ്രസിദ്ധീകരണ സംവിധാനവും കയ്യിലുള്ള ജമാഅത്തിനു അവരുടെ ജാനാധിപത്യത്തോടും ഇന്ത്യയുടെ മതനിരപേക്ഷ സംവിധാനത്തോടുമുള്ള നിലപാടുകളില്‍ സുതാര്യത വരുത്താതെ രാഷ്ട്രീയഭൂമിക നല്‍കപ്പെടുന്നത് ന്യൂനപക്ഷങ്ങളെ വരി നിര്‍ത്തി ലീഗൊരുക്കിയ മതനിരപേക്ഷ മണ്ണിനെ വിഷലിപ്തമാക്കാനെ ഉപകരിക്കൂ എന്നത് മനസ്സിലാക്കുന്നു.  അത് കൊണ്ട് തന്നെ ജമാഅത്തിനെ രാഷ്ട്രീയമായി ലീഗ് പ്രതിരോധിച്ചു കൊണ്ടേയിരിക്കും, കോട്ടക്കല്‍ കഷായമായിട്ടും യുവജന 
കാമ്പയിനുകളുമായിട്ടൊക്കെ തന്നെ. അതിനാലുള്ള ചൊറിച്ചില്‍  എ ആറും ദാവൂദുമൊക്കെ മഷി പുരട്ടി ഉരച്ച് തീര്‍ത്തു കൊണ്ടുമിരിക്കട്ടെ.     

8 comments:

  1. ശരിയായതും സത്യമായതും നിലനില്‍ക്കും

    ReplyDelete
  2. ലീഗടക്കം ഉള്ള മത സംഘടനകള്‍ ആണ് മുസ്ലിം സമുദായത്തിന്റെ ദുര്ഗ്ഗതിക് കാരണം ,യാതൊരു പ്രതിബദ്ധതയും സ്വസമുടായ്ത്തോട് ഇല്ലാത്ത ഇക്കൂട്ടര്‍ കാട്ടിക്കൂട്ടുന്ന വിഡ്ഢിത്തങ്ങള്‍ കുറച്ചൊന്നുമല്ല ആ സമുദായത്തെ ക്ഷീണിപ്പിക്കുന്നത്

    ReplyDelete
  3. നല്ല രചന
    ആശംസകള്‍

    ReplyDelete
  4. വ്യക്തവും ശക്തവുമായ വിശകലനം..... പരാജിതന്റെ ദു:ഖം ചില സന്ദർഭങ്ങളിൽ ജമാ അത്തിനെ അസൂയാലുക്കളാക്കാറുണ്ട് എന്നതിൽ കവിഞ്ഞ് AR ദാവൂദാദി വൃന്ദങ്ങൾ ലീഗിനെ "ഉപദേശിച്ചു" നന്നാക്കീക്കളയാമെന്ന ചിന്തയോടെ അല്ല ഇത്തരം പേനയുന്തൽ നടത്തുന്നത് എന്ന് ആർക്കും മനസ്സിലാവും...

    ആശംസകൾ !!!

    ReplyDelete
  5. ആ കഷായക്കൂട്ടിനു ഇപ്പൊ എന്ത് സംഭവിച്ചു എന്ന് കാണാന്‍ കണ്ണുണ്ടാവണം. കേവല രാഷ്ട്രീയ നേട്ടത്തിന് വേണ്ടി പോലും ഐക്യപ്പെടാന്‍ സാധിക്കുമെന്ന് തെളിയിച്ചു കഴിഞ്ഞ 'കഷായക്കൂട്ടിലെ' സംഘടനകള്‍ കാര്യം കഴിഞ്ഞപ്പോള്‍ തെരുവ് യുദ്ധത്തിലേക്ക് തന്നെ പോയത്‌ നമ്മള്‍ കണ്ടതല്ലേ. അപ്പോപിന്നെ സമുദായ സ്നേഹവും ഐക്യവും പറയുന്നവരുടെ ഉദ്ദേശശുദ്ധിയും ഉരകല്ലില്‍ ഉരച്ചുതന്നെ നോക്കണം. ജയിച്ചാല്‍ ജയ് വിളിക്കണം എന്ന് മാത്രം പഠിച്ചാല്‍ പോര. ജയം ധാര്‍മികവുമാകണം എന്ന ഇസ്ലാമിക ബാലപാഠം നേതാക്കള്‍ക്കില്ലെങ്കിലും അണികള്‍ക്കുണ്ടാവുന്നത് നന്ന്.
    എന്തായാലും ലേഖനം നന്നായിട്ടുണ്ട്. ഇനിയും എഴുതുക.

    ReplyDelete
  6. This comment has been removed by the author.

    ReplyDelete
  7. "പക്വമായ പ്രവര്‍ത്തന ശൈലിയും നിലവാരമുള്ള പ്രസിദ്ധീകരണ സംവിധാനവും കയ്യിലുള്ള ജമാഅത്തിനു അവരുടെ ജാനാധിപത്യത്തോടും ഇന്ത്യയുടെ മതനിരപേക്ഷ സംവിധാനത്തോടുമുള്ള നിലപാടുകളില്‍ സുതാര്യത വരുത്താതെ രാഷ്ട്രീയഭൂമിക നല്‍കപ്പെടുന്നത് ന്യൂനപക്ഷങ്ങളെ വരി നിര്‍ത്തി ലീഗൊരുക്കിയ മതനിരപേക്ഷ മണ്ണിനെ വിഷലിപ്തമാക്കാനെ ഉപകരിക്കൂ എന്നത് മനസ്സിലാക്കുന്നു." വളരെ നല്ല നിരീക്ഷണം.. പക്ഷെ "ലീഗൊരുക്കിയ മതനിരപേക്ഷ മണ്ണിനെ" ഇപ്പോള്‍ തന്നെ മറ്റു പലതും വിഷലിപ്തമാക്കുന്നില്ലേ? ആ വിടവിലല്ലേ ഇവരൊക്കെ രാഷ്ട്രീയ സംഘടനകളുമായി വരുന്നത്. സമൂഹ താല്പര്യം മുന്‍ നിര്‍ത്തി പ്രവര്‍ത്തിക്കുന്നധിലധികം സമുദായത്തിലെ പ്രമാണിമാരുടെ താല്പര്യം സംരക്ഷിച്ചു പ്രവര്‍ത്തിക്കുന്നതല്ലേ ലീഗിന് സംഭവിക്കുന്ന അപചയം? (മഞ്ഞളാംകുഴി അലി അവസാന ഉദാഹരണം). ലീഗിനെതിരെ വര്‍ഗീയ ആരോപണങ്ങള്‍ മുന്‍പും വന്നിട്ടുണ്ടെങ്കിലും ഇപ്പോള്‍ അവയുടെ തീവ്രത കൂടിയത് എന്ത് കൊണ്ടാണെന്ന് എന്നും വിലയിരുത്തെണ്ടതല്ലേ?

    ReplyDelete
  8. ഒരുപാട് പറയാന്‍ ഉണ്ട് ....പക്ഷെ ഇപ്പോഴിതാ ഒരു പുഞ്ചിരി മാത്രം !!
    നേരില്‍ കാണുമ്പോള്‍ അങ്ങനെ ഉണ്ടായാല്‍ നമുക്ക് തര്‍ക്കിക്കാം വെറുതെയല്ല...നമ്മുടെ നാടിന്‍റെ നന്മക്കായ് ...
    സസ്നേഹം അതുമാത്രമാണ് അസ്രുസ് ....
    ആശംസകളോടെ
    ഒപ്പ് പിന്നെ ഒരു കുത്ത് (.)

    ReplyDelete

LinkWithin

Related Posts Plugin for WordPress, Blogger...